قازاقستاندا 1 ناۋرىزدان باستاپ «وتاۋ» جاڭا تۇرعىن ءۇي باعدارلاماسى ىسكە قوسىلادى. بۇل تۋرالى وتباسى بانكىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
باعدارلاماعا وتباسى بانك سالىمشىلارى، ونىڭ ىشىندە تۇرعىن ءۇي كەزەگىندە تۇرعان ازاماتتار قاتىسا الادى.
ۇمىتكەردىڭ جيناق شوتىنا ەڭ كەمى 18 اي تولۋى كەرەك;
ءوتىنىم بەرۋ ساتىندە دەپوزيتتەگى جيناق سوماسى 1 ملن تەڭگەدەن كەم بولماۋى ءتيىس;
قاتىسۋشىنىڭ جاسى 18-دەن 63 جاس ارالىعىندا بولۋى قاجەت;
باعدارلاماعا قاتىسۋشىدا جانە ونىڭ وتباسى مۇشەلەرىندە سوڭعى 5 جىل ىشىندە جىلجىمايتىن مۇلىك بولماۋى كەرەك.
سونداي-اق الماتى جانە استانا قالالارىنان تۇرعىن ءۇي الاتىن جاعدايدا بۇل قالالاردا تۇراقتى تىركەۋ بولۋى قاجەت.
«وتاۋ» باعدارلاماسى جۇمىس ىستەيتىن جاستاردى، جاس وتباسىلاردى، وتباسى بانكىنىڭ سالىمشىلارىن تۇرعىن ۇيمەن قامتاماسىز ەتۋگە باعىتتالعان. بۇل جىل سايىن زاەمداردىڭ جارتىسىنان استامى 35 جاسقا دەيىنگى قازاقستاندىقتارعا كرەديت بەرۋگە بولىنەتىنىن بىلدىرەدى. جىل سايىن ءبىز قارجىلاندىرۋعا 150 ملرد تەڭگە باعىتتايمىز. بۇل اقشا وتباسى بانكتىڭ ءوز قاراجاتى ەسەبىنەن بولىنەدى، سونداي-اق قازاقستاندىق قارجى نارىعىنان دا قارىز الىپ، قاراجات تارتۋدى جوسپارلاپ وتىرمىز. «وتاۋ» باعدارلاماسى 7 جىلعا ەسەپتەلگەن. وسى كەزەڭدە ءبىز 50 مىڭ ازاماتتىڭ تۇرعىن ءۇي ماسەلەسىن شەشۋگە كومەكتەسەمىز»،— دەيدى بانكتىڭ باسقارما توراعاسى ءلاززات يبراگيموۆا.
ۇپايلار قالاي ەسەپتەلەدى؟
- سالىم بويىنشا سىياقى مولشەرى ءۇشىن - ءاربىر 1 000 تەڭگەگە 5 بالل;
- سالىم مەرزىمى ءۇشىن - سالىمنىڭ ءاربىر جىلى ءۇشىن 5 بالل;
- تىركەلگەن نەكە ءۇشىن - 10 بالل;
– بالالاردىڭ بولۋى ءۇشىن - سانىنا قاراماستان 50 بالل.
ەگەر ۇمىتكەرلەردىڭ ۇپايلارىنىڭ سانى بىردەي بولىپ قالسا، وندا باسىمدىق سالىم سوماسى كوبىرەك جانە جيناقتاۋ مەرزىمى ۇزاعىراق ادامدارعا بەرىلەدى.
ىرىكتەۋدەن وتكەن قاتىسۋشىلار 40 جۇمىس كۇنى ىشىندە نەسيەلىك ءوتىنىم بەرە الادى. بانكتەن وڭ ماقۇلداۋ العان جاعدايدا نەسيەلىك ءوتىنىم 6 اي ىشىندە جارامدى بولادى. وسى ۋاقىت ارالىعىندا باعدارلاماعا قاتىسۋشى باسپانا تاۋىپ، نەسيە الىپ، ونى ساتىپ الۋى كەرەك.
زاەم كولەمى قانداي جانە قانداي تۇرعىن ءۇي ساتىپ الۋعا بولادى؟
- الماتى مەن استاناداعى زاەمنىڭ ەڭ جوعارى سوماسى - 30 ملن تەڭگەگە دەيىن;
- قالعان وڭىرلەردە - 18 ملن تەڭگەگە دەيىن.
- تەك العاشقى نارىقتاعى تۇرعىن ءۇي - الماتى، استانا، شىمكەنت قالالارىندا جانە وبلىس ورتالىقتارىندا (ونىڭ ىشىندە قتك كەپىلدىگىمەن ۇلەستىك قاتىسۋ شارتى بويىنشا);
- باسقا ەلدى مەكەندەردە كەز كەلگەن تۇرعىن ءۇي.
باعدارلاماعا قاتىسۋشى جاڭا تۇرعىن ءۇيدى باسپانا ماركەت (otbasybank.kz) پورتالىنان عانا ساتىپ الا الادى. بۇل قىزمەت جاڭا تۇرعىن ءۇي باعدارلاماسىنىڭ باستالۋى اياسىندا تۇرعىن ءۇي باعاسىنىڭ جاساندى وسۋىنە جول بەرمەۋگە ارنالعان.
«وتاۋ» باعدارلاماسىن ىسكە اسىرۋدىڭ بارىنشا اشىقتىعى ءۇشىن ونىڭ قاتىسۋشىلارىنىڭ ءتىزىمى (زاەم الۋشىلاردىڭ كەلىسىمىمەن) وتباسى بانكىنىڭ سايتىندا جاريالاناتىن بولادى. ءاربىر ادام وتىنىمدەردى ىرىكتەۋ جانە ۇپايلاردى ەسەپتەۋ ناتيجەلەرىمەن otbasybank.kz پورتالدا تانىسا الادى.