Qazaqstanda 1 naýryzdan bastap «Otaý» jańa turǵyn úı baǵdarlamasy iske qosylady. Bul týraly Otbasy bankiniń baspasóz qyzmeti aıtty, dep habarlaıdy «Adyrna» tilshisi.
Baǵdarlamaǵa Otbasy bank salymshylary, onyń ishinde turǵyn úı kezeginde turǵan azamattar qatysa alady.
Úmitkerdiń jınaq shotyna eń kemi 18 aı tolýy kerek;
Ótinim berý sátinde depozıttegi jınaq somasy 1 mln teńgeden kem bolmaýy tıis;
Qatysýshynyń jasy 18-den 63 jas aralyǵynda bolýy qajet;
Baǵdarlamaǵa qatysýshyda jáne onyń otbasy múshelerinde sońǵy 5 jyl ishinde jyljymaıtyn múlik bolmaýy kerek.
Sondaı-aq Almaty jáne Astana qalalarynan turǵyn úı alatyn jaǵdaıda bul qalalarda turaqty tirkeý bolýy qajet.
«Otaý» baǵdarlamasy jumys isteıtin jastardy, jas otbasylardy, Otbasy bankiniń salymshylaryn turǵyn úımen qamtamasyz etýge baǵyttalǵan. Bul jyl saıyn zaemdardyń jartysynan astamy 35 jasqa deıingi qazaqstandyqtarǵa kredıt berýge bólinetinin bildiredi. Jyl saıyn biz qarjylandyrýǵa 150 mlrd teńge baǵyttaımyz. Bul aqsha Otbasy banktiń óz qarajaty esebinen bólinedi, sondaı-aq qazaqstandyq qarjy naryǵynan da qaryz alyp, qarajat tartýdy josparlap otyrmyz. «Otaý» baǵdarlamasy 7 jylǵa eseptelgen. Osy kezeńde biz 50 myń azamattyń turǵyn úı máselesin sheshýge kómektesemiz»,— deıdi banktiń basqarma tóraǵasy Lázzat Ibragımova.
Upaılar qalaı esepteledi?
- salym boıynsha syıaqy mólsheri úshin - árbir 1 000 teńgege 5 ball;
- salym merzimi úshin - salymnyń árbir jyly úshin 5 ball;
- tirkelgen neke úshin - 10 ball;
– balalardyń bolýy úshin - sanyna qaramastan 50 ball.
Eger úmitkerlerdiń upaılarynyń sany birdeı bolyp qalsa, onda basymdyq salym somasy kóbirek jáne jınaqtaý merzimi uzaǵyraq adamdarǵa beriledi.
Irikteýden ótken qatysýshylar 40 jumys kúni ishinde nesıelik ótinim bere alady. Bankten oń maquldaý alǵan jaǵdaıda nesıelik ótinim 6 aı ishinde jaramdy bolady. Osy ýaqyt aralyǵynda baǵdarlamaǵa qatysýshy baspana taýyp, nesıe alyp, ony satyp alýy kerek.
Zaem kólemi qandaı jáne qandaı turǵyn úı satyp alýǵa bolady?
- Almaty men Astanadaǵy zaemnyń eń joǵary somasy - 30 mln teńgege deıin;
- qalǵan óńirlerde - 18 mln teńgege deıin.
- tek alǵashqy naryqtaǵy turǵyn úı - Almaty, Astana, Shymkent qalalarynda jáne oblys ortalyqtarynda (onyń ishinde QTK kepildigimen úlestik qatysý sharty boıynsha);
- basqa eldi mekenderde kez kelgen turǵyn úı.
Baǵdarlamaǵa qatysýshy jańa turǵyn úıdi Baspana market (otbasybank.kz) portalynan ǵana satyp ala alady. Bul qyzmet jańa turǵyn úı baǵdarlamasynyń bastalýy aıasynda turǵyn úı baǵasynyń jasandy ósýine jol bermeýge arnalǵan.
«Otaý» baǵdarlamasyn iske asyrýdyń barynsha ashyqtyǵy úshin onyń qatysýshylarynyń tizimi (zaem alýshylardyń kelisimimen) Otbasy bankiniń saıtynda jarııalanatyn bolady. Árbir adam ótinimderdi irikteý jáne upaılardy esepteý nátıjelerimen otbasybank.kz portalda tanysa alady.