رەسەيلىك وپپوزيتسيا جەتەكشىسى الەكسەي ناۆالنىي قايتىس بولدى. بۇل تۋرالى ول جازاسىن وتەپ جاتقان يامالو-نەنەتسك اۆتونوميالىق وكرۋگى بويىنشا فەدەرالدىق قىلمىستىق اتقارۋ قىزمەتىنىڭ دەپارتامەنتى ايتتى، دەپ حابارلايدى «ادىرنا» ءتىلشىسى ريا نوۆوستي-گە سىلتەمە جاساپ.
«16 اقپان كۇنى №3 تۇزەۋ كولونياسىندا سوتتالۋشى ناۆالنىي ا.ا. سەرۋەندەگەننەن كەيىن بىردەن ەسىنەن تانىپ، ءوزىن ناشار سەزىندى. مەكەمەنىڭ مەديتسينا قىزمەتكەرلەرى دەرەۋ كەلىپ، جەدەل جاردەم بريگاداسى شاقىرىلدى. بارلىق قاجەتتى رەانيماتسيالىق شارالار جۇرگىزىلدى، بىراق وڭ ناتيجە بەرمەدى. جەدەل جاردەم دارىگەرلەرى سوتتالۋشىنىڭ قايتىس بولعانىن راستادى»،—دەلىنگەن حابارلامادا.
قازىرگى تاڭدا ءولىمنىڭ سەبەپتەرى انىقتالىپ جاتىر.
ەسكە سالايىق، بىلتىر «ۆاگنەر» جالدامالى اسكەر توبىنىڭ نەگىزىن قالاۋشى ەۆگەني پريگوجين ماسكەۋگە اسكەرمەن اتتانىپ، كرەملدىڭ زارەسىن ۇشىرعاننان كەيىن ۇشاق اپاتىنان وپات بولعان ەدى.