2024 جىلى 3 اقپاندا سولتۇستىك قازاقستان وبلىسى پوليتسيا دەپارتامەنتىنىڭ قىزمەتكەرلەرى “تيولاين" كومپانياسى تەڭ يەلەرىنىڭ ءبىرى ۆيكتور دولگالەۆ جەر قويناۋىن رۇقساتسىز پايدالانعانى ءۇشىن ۇستادى، دەپ حابارلايدى “ادىرنا” ۇلتتىق پورتالى.
قازىرگى ول ۋاقىتشا ۇستاۋ يزولياتورىنا قامالدى. قىلمىستىق ءىستى ودان ءارى تەرگەپ-تەكسەرۋگە وبلىس بويىنشا قارجىلىق مونيتورينگ اگەنتتىگىنە بەرىلدى.
بۇدان باسقا، ۆ.دولگالەۆكە قاتىستى اسا ءىرى كولەمدە كىرىس الۋ ارقىلى زاڭسىز كاسىپكەرلىكپەن اينالىسقانى ءۇشىن تەرگەۋ جۇرگىزىلىپ جاتىر.
"تەرگەۋ مالىمەتتەرى بويىنشا، 2021 جىلدىڭ ناۋرىز ايىندا يندۋستريا جانە ينفراقۇرىلىمدىق دامۋ مينيسترلىگى كومپانيانىڭ 38 ملرد تەڭگەگە قارجىلىق جانە ينۆەستيتسيالىق مىندەتتەمەلەرىن ورىنداماۋىنا بايلانىستى "وبۋحوۆسكوە" كەن ورنىندا جەر قويناۋىن پايدالانۋ بويىنشا كەلىسىمشارتتى مەرزىمىنەن بۇرىن توقتاتقان", – دەدى قارجىلىق مونيتورينگ اگەنتتىگىنىڭ رەسمي وكىلى الىبەك ءابدىلوۆ.
جوعارعى سوت قۇزىرەتتى ورگاننىڭ ءىس-قيمىلدارىنىڭ زاڭدىلىعىن راستادى.
سونىمەن قاتار 2020 جىلدىڭ 1 ماۋسىمىندا سوت شەشىمىمەن ۆ.دولگالەۆكە "تيولاين" كومپانياسىنىڭ مۇلكىن باسقارۋعا تىيىم سالىندى.
بۇعان قاراماستان، ۆ.دولگالەۆ ءوزىنىڭ باقىلاۋىنداعى قۇرىلىمدار ارقىلى زاڭسىز تاۋ-كەن ءوندىرىسىن جالعاستىرىپ، قىتايعا جانە باسقا ەلدەرگە سۇر سحەمالار بويىنشا ەكسپورتتاعان كورىنەدى.
"تەك ءۇش جىل ىشىندە (2021-2023 جج.) 113 مىڭ تونناعا جۋىق كەن ەكسپورتتالدى. ماماننىڭ قورىتىندىسى بويىنشا قىلمىستىق تابىستىڭ جالپى سوماسى 26 ميلليارد تەڭگەدەن استى. بۇل قاراجاتقا ەنشىلەس تۇلعالار ارقىلى كەن ورنىنا ىرگەلەس جاتقان 7,5 مىڭعا جۋىق گەكتار اۋىل شارۋاشىلىعى ماقساتىنداعى جەرلەر ساتىپ الىنىپ، ول جەردە دە زاڭسىز كەن ءوندىرۋ جۇرگىزىلگەن. 2 ميلليارد تەڭگەگە بيۋدجەتكە تولەنەتىن سالىقتار مەن تولەمدەردەن جالتارۋ فاكتىلەرى انىقتالدى. قازىرگى ۋاقىتتا جاسالعان قىلمىستىڭ بارلىق ءمان-جايىن انىقتاۋعا باعىتتالعان تەرگەۋ ارەكەتتەرى جۇرگىزىلىپ جاتىر. قر قپك-ءنىڭ 201-بابى تارتىبىندەگى وزگە دە اقپارات جاريا ەتۋگە جاتپايدى", – دەدى الىبەك ءابدىلوۆ.
