ۇلىتاۋ وبلىسىندا جەر سىلكىنىسى بولعانى تۋرالى اقپارات تارادى، دەپ حابارلايدى "ادىرنا" ءتىلشىسى Tengrinews.kz-كە سىلتەپ.
تىركەلگەن دەرەكتەرگە سايكەس, جەر استى دۇمپۋلەرى 14 اقپان كۇنى استانا ۋاقىتى بويىنشا ساعات 11:09-دا تىركەلگەن.
"ساتباەۆ قالاسىنان وڭتۇستىك-باتىسقا قاراي 9 شاقىرىم جەردە جەر سىلكىنىسى بولدى. ماگنيتۋداسى-4,6. ەنەرگەتيكالىق كلاسس - 11", - دەلىنگەن قازاقستاندىق دەرەكتەر ورتالىعىنىڭ حابارلاماسىندا.
توتەنشە جاعدايلار مينيسترلىگى بولسا، "سەزىلمەگەن سەيسميكالىق وقيعالار" تۋرالى حابارلادى.
"14.02. ساعات 08.00-دەن 11.42-گە دەيىنگى ارالىقتا ۇلىتاۋ وبلىسىنىڭ ساتباەۆ قالاسىندا «قازاقمىس» جشس باس گەومەحانيگى وڭتۇستىك جەزقازعان كەنىشىنىڭ جۇمىس ىستەپ تۇرعان №65 شاحتاسىندا بوس ورىنداردى ماجبۇرلەپ جوسپارلى وتەۋ ورىن العانى تۋرالى حابارلاما ءتۇستى، سونىڭ سالدارىنان سەزىلمەگەن سەيسميكالىق وقيعالار تىركەلدى. زارداپ شەككەندەر تۋرالى اقپارات تۇسكەن جوق. وقيعا ورنىنا تجد قىزمەتكەرلەرى (شامامەن 20 كم قاشىقتىق) شىقتى", - دەلىنگەن مينيسترلىك حابارلاماسىندا.
دەگەنمەن، جەر سىلكىنىسىن ونلاين كورسەتەتىن بازالاردا سوڭعى تاۋلىكتە ورتالىق ازيا بويىنشا جەر سىلكىنىسى تىركەلمەدى.
بىرنەشە كۇن بۇرىن جەلىدە "جەر سىلكىنىسى بولادى" دەگەن اقپارات تاراعان بولاتىن. الايدا الماتىداعى بريفينگ بارىسىندا سەيسمولوگيالىق باقىلاۋلار مەن زەرتتەۋلەر ۇلتتىق عىلىمي ورتالىعىنىڭ ديرەكتورى داۋلەت سارسەنباەۆ جەر سىلكىنىسى كۇتىلمەيتىنىن مالىمدەدى.
"2024 جىلعا 70 پايىز قاتتى جەر سىلكىنىسى كۇتىلمەيدى", - دەدى داۋلەت سارسەنباەۆ.
