ماۋسىمنىڭ 22-ءسى كۇنى وتكەن نارازىلىق شاراسى الدىڭعى ەكى كۇنگە قاراعاندا بەيبىر ءارى تىنىش ءوتتى. ماۋسىمنىڭ 23-ىنە قاراعان ءتۇنى مىڭداعان ازامات پارلامەنت عيماراتى الدىنان "گرۋزين ارمانى" بيلىك پارتياسىنىڭ كەڭسەسى ورنالاسقان جاققا قاراي قوزعالدى.
عيماراتتى قورشاعان پوليتسيامەن نارازىلار بەتپە-بەت كەلدى. ءبىر كۇن بۇرىن ەلدىڭ پارلامەنت سپيكەرى يراكلي كوباحيدزە وتستاۆكاعا كەتەتىنىن مالىمدەسە دە، وپپوزيتسيالىق پارتيا وكىلدەرى نارازىلىق شاراسىن جالعاستىرا بەرەتىنىن ايتقان. نارازى ازاماتتار ىشكى ىستەر ءمينيسترىنىڭ وتستاۆكاعا كەتۋىن تالاپ ەتتى. ولار سونىمەن بىرگە نارازىلىقتىڭ العاشقى كۇنى ۇستالعان ازاماتتاردى بوساتۋدى، حالىققا كۇش قولدانعان پوليتسيا قىزمەتكەرلەرىن جازالاۋدى سونىمەن قاتار ەلدە كەزەكتەن تىس پارلامەنت سايلاۋىن وتكىزۋدى تالاپ ەتتى.
ماۋسىمنىڭ 20-ى كۇنى تبيليسيدە بولعان جاپپاي نارازىلىققا رەسەيلىك دەپۋتات سەرگەي گاۆريلوۆتىڭ گرۋزيا پارلامەنتى توراعاسىنىڭ ورىندىعىنا وتىرىپ الۋى تۇرتكى بولعان ەدى. تبيليسيگە ساپارمەن كەلگەن رەسەي مەملەكەتتىك دۋماسىنىڭ دەپۋتاتى، رەسەي كوممۋنيستىك پارتياسىنىڭ مۇشەسى سەرگەي گاۆريلوۆ الەمنىڭ بىرقاتار ەلىنىڭ وكىلدەرىن بىرىكتىرەتىن پارلامەنتارالىق پراۆوسلاۆيە اسسامبلەياسىنىڭ جيىنىنا توراعالىق ەتكەن.
گاۆريلوۆتى رەسەي پرەزيدەنتى ۆلاديمير ءپۋتيننىڭ سەرىگى دەپ سانايتىن گرۋزيالىق ازاماتتار ول گرۋزيانىڭ سەپاراتيستىك ايماقتارى - ابحازيا مەن وڭتۇستىك وسەتياعا قولداۋ بىلدىرگەن ماسكەۋدىڭ ءىس-ارەكەتىن قۇپتايدى دەپ سانايدى.
گرۋزيا پرەزيدەنتى سالومە زۋرابيشۆيلي گاۆريلوۆتىڭ ءىس-ارەكەتى - "ايتارلىقتاي قىلمىس", بىراق قوعامنىڭ كوتەرىلۋىن ونىمەن اقتاۋعا بولمايدى دەپ، نارازىلىقتىڭ ارتىندا باسقا ءبىر كۇشتەر تۇرۋى مۇمكىن دەگەندى مەڭزەگەن.
ماۋسىمنىڭ 22-ءسى كۇنى مىڭداعان شەرۋشى پارلامەنت عيماراتى الدىندا تەلەفوندارىنىڭ جارىعىن قوسىپ، گرۋزيانىڭ ۇلتتىق ءانۇرانىن ايتتى. پوليتسەيلەر پارلامەنت عيماراتىنىڭ ماڭىن بولات قورشاۋمەن بەكىتتى. ميتينگكە كەلگەندەر اراسىندا باس سۇيەگىندە رەزەڭكە وق تۇرعانى كورىنەتىن رەنتگەن سۋرەتى تاراتىلدى. بۇل ماۋسىمنىڭ 20-سى كۇنى نارازىلىق كەزىندە باسىنا رەزەڭكە وق تيگەن ازاماتتىڭ رەنتگەن انىقتاماسى ەكەنى ايتىلدى.
وپپوزيتسيالىق پارتيا وكىلدەرى ەلدى الاڭداتقان ساياسي-ەكونوميكالىق ماسەلەلەرگە قاتىسى جوق جايتتاردى دا قوزعاپ، نارازىلار تالابىنىڭ اۋقىمىن كەڭەيتۋگە تىرىستى.
"ۇكىمەت قوعاممەن بايلانىسى جوق، ەشكىمگە ەسەپ بەرۋى مىندەت ەمەس دەپ سانايتىن كەۋدەمسىماق ورگان سياقتى اسەر قالدىرادى. ال وپپوزيتسيا قولدا بار رەسەي كارتاسىن پايدالانىپ، "گرۋزين ارمانىن" رەسەيگە جۇمساقتىق تانىتتى دەپ ايىپتاۋعا تىرىسىپ جاتىر" دەيدى كارنەگي ينستيتۋتىنىڭ ساياسي ساراپشىسى توماس دە ۆالل.
ءتبيليسيدىڭ گرۋزيادان بولىنەتىنىن مالىمدەگەن ەكى ايماق - وڭتۇستىك وسەتيا مەن ابحازيانى قايتادان ءوز باقىلاۋىنا الۋعا جانە باتىس ۇيىمدارىنا قوسىلىپ، ناتو ۇيىمىنا ەنۋگە دەگەن تالپىنىسى 2008 جىلى رەسەيمەن اراداعى بەس كۇندىك سوعىسقا سەبەپ بولعان. سودان بەرى ەكى ەل اراسىندا جاعداي سالقىنداعان.
گرۋزيا پرەزيدەنتى سالومە زۋرابيشۆيلي رەسەيدى "باسقىنشى ءارى مەملەكەت جاۋى" دەپ اتاپ، ماسكەۋ نارازىلىققا سەبەپشى بولدى دەپ ايىپتادى.
رەسەيدىڭ ىشكى ىستەر ءمينيسترىنىڭ ورىنباسارى گريگوري كاراسين ماۋسىمنىڭ 21-ءى كۇنى نارازىلىقتى "گرۋزياداعى راديكالدى ساياسي كۇشتەردىڭ قارسىلىعى" دەپ اتادى.
كاراسيننىڭ ايتۋىنشا، تبيليسيدەگى شەرۋشىلەر "وتە ماڭىزدى حالىقارالىق فورۋمدى" پايدالانىپ، ەلدە رەسەيگە قارسى كوڭىل-كۇيدى ارتتىرىپ وتىر.
ماۋسىمنىڭ 21-ءى كۇنى رەسەي پرەزيدەنتى ۆلاديمير پۋتين شىلدەنىڭ 8-ىنەن باستاپ رەسەيدەن گرۋزياعا جولاۋشىلار تاسىمالداۋعا تىيىم سالدى.
ءپۋتيننىڭ ءباسپاسوز حاتشىسى دميتري پەسكوۆ گرۋزياداعى جاعداي قالپىنا كەلمەيىنشە تىيىم كۇشىندە بولاتىنىن ايتقان.
"گرۋزياداعى جاعداي قالپىنا كەلۋى ءتيىس جانە ازاماتتارىمىزدىڭ ومىرىنە قاۋىپ تونبەۋى قاجەت" دەدى ول.
گرۋزيانىڭ اقپارات قۇرالدارى نارازىلىقتىڭ ءبىرىنشى كۇنى ونداعان ادامنىڭ ۇستالعانىن حابارلادى. ولاردىڭ كوبى كەيىن بوساتىلعان.
ماۋسىمنىڭ 22-ءسى كۇنى پارلامەنت عيماراتى ماڭىنداعى جولعا وتىرىپ العان جاستار پوليتسيادا قامالعان دوستارى بوستاندىققا شىقپايىنشا ول جەردەن كەتپەيتىنىن ايتتى. ولاردىڭ كەيبىرىنىڭ قولىندا "سوعىس جالعاسىپ جاتىر. رەسەي باسقىنشىلىعىنا توزبەيمىز" دەگەن جازۋى بار پلاكات بولعان.
گرۋزيانىڭ دەنساۋلىق ساقتاۋ مينيسترلىگىنىڭ دەرەگىنشە، نارازىلار مەن پوليتسيا قاقتىعىسى كەزىندە 240 ادام زارداپ شەككەن. ەلدىڭ ءىىم 305 ادامنىڭ ۇستالعانىن حابارلادى. سوڭعى اقپارات بويىنشا اۋرۋحانادا نارازىلىق كەزىندە زارداپ شەككەن 56 ادام ەم قابىلداپ جاتىر.
ۆەدومستۆو 20 ماۋسىمدا پوليتسيامەن قاقتىعىس كەزىندە جارالانعان شەرۋشىلەردىڭ ءبىرى قازا تاپتى دەگەن اقپاراتتى جوققا شىعاردى. بۇعان دەيىن گرۋزين تىلىندە اقپارات تاراتاتىن Agenda.ge سايتى، Euronews-ءتىڭ ورىس رەداكتسياسى جانە بىرقاتار اقپارات قۇرالدارى قاقتىعىس كەزىندە كوزىنەن جاراقات العان شەرۋگە شىققان ازاماتتاردىڭ ءبىرى اۋرۋحانادا كوز جۇمدى دەپ حابارلاعان ەدى.
"ازاتتىق" راديوسى
