Maýsymnyń 22-si kúni ótken narazylyq sharasy aldyńǵy eki kúnge qaraǵanda beıbir ári tynysh ótti. Maýsymnyń 23-ine qaraǵan túni myńdaǵan azamat parlament ǵımaraty aldynan "Grýzın armany" bılik partııasynyń keńsesi ornalasqan jaqqa qaraı qozǵaldy.
Ǵımaratty qorshaǵan polıııamen narazylar betpe-bet keldi. Bir kún buryn eldiń parlament spıkeri Iraklıı Kobahıdze otstavkaǵa ketetinin málimdese de, oppozıııalyq partııa ókilderi narazylyq sharasyn jalǵastyra beretinin aıtqan. Narazy azamattar ishki ister mınıstriniń otstavkaǵa ketýin talap etti. Olar sonymen birge narazylyqtyń alǵashqy kúni ustalǵan azamattardy bosatýdy, halyqqa kúsh qoldanǵan polıııa qyzmetkerlerin jazalaýdy sonymen qatar elde kezekten tys parlament saılaýyn ótkizýdi talap etti.
Maýsymnyń 20-y kúni Tbılısıde bolǵan jappaı narazylyqqa reseılik depýtat Sergeı Gavrılovtyń Grýzııa parlamenti tóraǵasynyń oryndyǵyna otyryp alýy túrtki bolǵan edi. Tbılısıge saparmen kelgen Reseı memlekettik dýmasynyń depýtaty, Reseı kommýnıstik partııasynyń múshesi Sergeı Gavrılov álemniń birqatar eliniń ókilderin biriktiretin Parlamentaralyq pravoslavıe assambleıasynyń jıynyna tóraǵalyq etken.
Gavrılovty Reseı prezıdenti Vladımır Pýtınniń serigi dep sanaıtyn grýzııalyq azamattar ol Grýzııanyń separatıstik aımaqtary - Abhazııa men Ońtústik Osetııaǵa qoldaý bildirgen Máskeýdiń is-áreketin quptaıdy dep sanaıdy.
Grýzııa prezıdenti Salome Zýrabıshvılı Gavrılovtyń is-áreketi - "aıtarlyqtaı qylmys", biraq qoǵamnyń kóterilýin onymen aqtaýǵa bolmaıdy dep, narazylyqtyń artynda basqa bir kúshter turýy múmkin degendi meńzegen.
Maýsymnyń 22-si kúni myńdaǵan sherýshi parlament ǵımaraty aldynda telefondarynyń jaryǵyn qosyp, Grýzııanyń ulttyq ánuranyn aıtty. Polıeıler parlament ǵımaratynyń mańyn bolat qorshaýmen bekitti. Mıtıngke kelgender arasynda bas súıeginde rezeńke oq turǵany kórinetin rentgen sýreti taratyldy. Bul maýsymnyń 20-sy kúni narazylyq kezinde basyna rezeńke oq tıgen azamattyń rentgen anyqtamasy ekeni aıtyldy.
Oppozıııalyq partııa ókilderi eldi alańdatqan saıası-ekonomıkalyq máselelerge qatysy joq jaıttardy da qozǵap, narazylar talabynyń aýqymyn keńeıtýge tyrysty.
"Úkimet qoǵammen baılanysy joq, eshkimge esep berýi mindet emes dep sanaıtyn keýdemsymaq organ sııaqty áser qaldyrady. Al oppozıııa qolda bar Reseı kartasyn paıdalanyp, "Grýzın armanyn" Reseıge jumsaqtyq tanytty dep aıyptaýǵa tyrysyp jatyr" deıdi Karnegı ınstıtýtynyń saıası sarapshysy Tomas de Vall.
Tbılısıdiń Grýzııadan bólinetinin málimdegen eki aımaq - Ońtústik Osetııa men Abhazııany qaıtadan óz baqylaýyna alýǵa jáne batys uıymdaryna qosylyp, NATO uıymyna enýge degen talpynysy 2008 jyly Reseımen aradaǵy bes kúndik soǵysqa sebep bolǵan. Sodan beri eki el arasynda jaǵdaı salqyndaǵan.
Grýzııa prezıdenti Salome Zýrabıshvılı Reseıdi "basqynshy ári memleket jaýy" dep atap, Máskeý narazylyqqa sebepshi boldy dep aıyptady.
Reseıdiń ishki ister mınıstriniń orynbasary Grıgorıı Karasın maýsymnyń 21-i kúni narazylyqty "Grýzııadaǵy radıkaldy saıası kúshterdiń qarsylyǵy" dep atady.
Karasınniń aıtýynsha, Tbılısıdegi sherýshiler "óte mańyzdy halyqaralyq forýmdy" paıdalanyp, elde Reseıge qarsy kóńil-kúıdi arttyryp otyr.
Maýsymnyń 21-i kúni Reseı prezıdenti Vladımır Pýtın shildeniń 8-inen bastap Reseıden Grýzııaǵa jolaýshylar tasymaldaýǵa tyıym saldy.
Pýtınniń baspasóz hatshysy Dmıtrıı Peskov Grýzııadaǵy jaǵdaı qalpyna kelmeıinshe tyıym kúshinde bolatynyn aıtqan.
"Grýzııadaǵy jaǵdaı qalpyna kelýi tıis jáne azamattarymyzdyń ómirine qaýip tónbeýi qajet" dedi ol.
Grýzııanyń aqparat quraldary narazylyqtyń birinshi kúni ondaǵan adamnyń ustalǵanyn habarlady. Olardyń kóbi keıin bosatylǵan.
Maýsymnyń 22-si kúni parlament ǵımaraty mańyndaǵy jolǵa otyryp alǵan jastar polıııada qamalǵan dostary bostandyqqa shyqpaıynsha ol jerden ketpeıtinin aıtty. Olardyń keıbiriniń qolynda "Soǵys jalǵasyp jatyr. Reseı basqynshylyǵyna tózbeımiz" degen jazýy bar plakat bolǵan.
Grýzııanyń densaýlyq saqtaý mınıstrliginiń dereginshe, narazylar men polıııa qaqtyǵysy kezinde 240 adam zardap shekken. Eldiń IIM 305 adamnyń ustalǵanyn habarlady. Sońǵy aqparat boıynsha aýrýhanada narazylyq kezinde zardap shekken 56 adam em qabyldap jatyr.
Vedomstvo 20 maýsymda polıııamen qaqtyǵys kezinde jaralanǵan sherýshilerdiń biri qaza tapty degen aqparatty joqqa shyǵardy. Buǵan deıin grýzın tilinde aqparat taratatyn Agenda.ge saıty, Euronews-tiń orys redakııasy jáne birqatar aqparat quraldary qaqtyǵys kezinde kózinen jaraqat alǵan sherýge shyqqan azamattardyń biri aýrýhanada kóz jumdy dep habarlaǵan edi.
"Azattyq" radıosy
