وسىدان 18 جىل بۇرىن ءدال وسى كۇنى مەملەكەت جانە قوعام قايراتكەرى، جۋرناليست، ديپلومات، ساياساتكەر التىنبەك سارسەنبايۇلى ەكى كومەكشىسىمەن بىرگە جوعالىپ، 13-ءى كۇنى الماتى ىرگەسىندەگى تاۋ بوكتەرىنەن دەنەسى تابىلعان بولاتىن.
وپپوزيتسيا جەتەكشىسى التىنبەك سارسەنبايۇلى مەن ونىڭ ەكى كومەكشىسى ۆاسيلي جۋراۆلەۆ پەن باۋىرجان بايبوسىندى 2006 جىلى اقپاننىڭ 11-ءى كۇنى ۇرلاپ اكەتكەن. وققا ۇشقان ۇشەۋىنىڭ ءمايىتى ەكى كۇننەن كەيىن، ياعني اقپاننىڭ 13-ءى كۇنى الماتى ىرگەسىندەگى تاۋ بوكتەرىنەن تابىلعان بولاتىن.
بۇل تۋرالى رەسمي باسىلىمداردا «قازاقستاننىڭ ۇلتتىق قاۋىپسىزدىك كوميتەتىنىڭ ارنايى توبى وفيتسەرلەرىنىڭ قاتىسۋىمەن جاسالعان قاستاندىقتىڭ ناتيجەسىندە قازا بولدى» دەپ جازىلدى.
ال، وتباسى مەن قىزمەتتەستەرى بۇل ءولىمدى ساياسي تۇرعىدان ولتىرىلگەن ءولىم دەپ اتادى جانە بۇل ولىمگە جاۋاپتى جوعارعى بيلىك دەپ ايتتى.
حالىقارالىق رەزونانس تۋدىرعان قىلمىسقا قاتىستى جۇرگىزىلگەن تەرگەۋ امالدارى مەن سوت پروتسەسىندە قاستاندىقتى «كەك الۋ ماقساتىمەن» ۇيىمداستىرۋشى دەپ تانىلىپ، سوتتالعان سەنات اپپاراتىنىڭ بۇرىنعى باسشىسى ەرجان وتەمباەۆ پەن ۇلتتىق قاۋىپسىزدىك كوميتەتىنىڭ (ۇقك) بۇرىنعى وفيتسەرلەرىنىڭ كەيبىرى جازاسىن وتەپ، ەركىندىككە شىقتى. بىراق قوعامنىڭ، اسىرەسە التىنبەك سارسەنبايۇلى جاقتاستارىنىڭ كوكەيىندەگى «ناعىز قىلمىسكەرلەر سوتتالدى ما؟» دەگەن كۇدىك ءالى كۇنگە دەيىن سەيىلمەي كەلەدى.
