پرەزيدەنت قاسىم-جومارت توقاەۆ «پارلامەنتتىك وپپوزيتسيا» زاڭ جوباسىنا قول قويدى. جاڭا زاڭ جوباسى الداعى ۋاقىتتا قالاي جۇمىس ىستەۋى مۇمكىن، پارلامەنتكە شىنايى وپپوزيتسيا كەلە مە دەگەن سۇراقتار بويىنشا «ادىرنا» ۇلتتىق پورتالى ساياساتتانۋشىلار دوس كوشىم مەن راسۋل جۇمالىنىڭ پىكىرىن ءبىلدى.
پارلامەنتكە وپپوزيتسيا كەلۋ ءۇشىن ساياسي پارتيالار تۋرالى جانە سايلاۋ تۋرالى زاڭ جوباسىن جوندەۋ كەرەك
دوس كوشىم مىرزانىڭ پىكىرىنشە پارلامەنتكە الداعى ۋاقىتتا جاڭا وپپوزيتسيالىق پارتيالار كەلەتىن بولسا، جاڭا زاڭ جوباسىنىڭ كەرەگى بار. ال بۇرىننان پارلامەنت قۇرامىنداعى پارتيالار ءبىز وپپوزيتسيانىڭ ءرولىن اتقارامىز دەسە، «ءرولىن» اتقارادى، الايدا وپپوزيتسيا بولىپ تابىلمايدى.
- پارلامەنتتەگى ازشىلىق جانە وپپوزيتسيا دەيتىن نارسە بار. ەكەۋى ەكى ءتۇرلى ماسەلە. قازىرگى تاڭدا بىزدە پارلامەنتتە وپپوزيتسيا جوق، بىراق كەلەشەكتە بولۋى مۇمكىن. زاڭ كەلەشەكتەگى كەلەتىن پارتيانىڭ جۇمىسىن جەڭىلدەتۋ ءۇشىن، سول جەردەگى كوميتەتتىڭ قانشاسىن وپپوزيتسياعا بەرۋ كەرەك دەگەن ماسەلەلەر بويىنشا قاجەت. بىراق وسى زاڭ قابىلدانعاننان كەيىن قازىرگى تۇرعان پارتيالار نە فراكتسيالار بىرەۋى ءبىز وپپوزيتسيانىڭ ءرولىن اتقارامىز دەسە، بۇل – بالانىڭ ويىنى سەكىلدى ۇيات نارسە.
ساياساتتانۋشى بيلىك پارلامەنتكە وپپوزيتسيا اكەلۋ تۋرالى ماسەلە قويىپ وتىرعان جوق، پارلامەنتتەگى ازشىلىققا وپپوزيتسيا دەگەن ات بەرۋ عانا دەگەن پىكىردە.
- پارلامەنتكە وپپوزيتسيا كەلۋ ءۇشىن، سايلاۋ تۋرالى، ساياسي پارتيالار تۋرالى زاڭ جوباسىن وزگەرتۋ كەرەك. مەنىڭ ويىمشا، ونداي ماسەلە بيلىكتە قارالعان جوق. ءبىز ايتىپ جاتقان ساياسي پارتيالار تۋرالى زاڭدا پارتياعا مۇشە ادام سانىن قىرىق مىڭنان جيىرما مىڭعا ءتۇسىردى. وسى عانا. ال ونىڭ ىشىندە كوپتەگەن وزگەرتەتىن باپتار بار. مەن ويلاپ ەدىم، كەمىندە ون شاقتى دوڭگەلەك ۇستەلدەر بولادى، تەلەديداردان ءتۇرلى ساياسي شوۋ بولادى، ادامدار كەلىپ پىكىرلەرىن ايتادى دەپ، بىرەۋى دە بولعان جوق.
ءبىر زاڭ قابىلداي سالۋمەن ماسەلە شەشىلمەيدى
بەلگىلى ساياساتتانۋشى راسۋل جۇمالى جاڭا زاڭ جوباسى دۇرىس باعىتتاعى العاشقى قادام، دەموكراتياعا جەتۋ جولىنداعى العىشارت دەپ بىلەدى.
- مەملەكەتتىڭ، قوعامنىڭ بىرقالىپتى دامۋى ءۇشىن دەموكراتيا كەرەك. ال دەموكراتيانىڭ نەگىزگى العىشارتى – وپپوزيتسيا. وپپوزياتسيا دەگەن وتىرىپ الىپ بىرجاقتى بيلىكتى سىناۋ ەمەس، بالاما پىكىر، بالاما باعدارلاما ۇسىنۋ. ءبىز ەرتە مە كەش پە شىنايى وپپوزيتسياعا كەلۋىمىز كەرەك. وسى تۇرعىدان العاندا جاڭا زاڭ جوباسىن جاقسى قادام دەپ باعالاۋعا بولادى. سەبەبى وپپوزيتسيا پارلامەنتتە بولۋ كەرەك دەگەن تۇسىنىكتىڭ ەنگىزىلۋىنىڭ ءوزى قۇپتارلىق شارۋا. بىراق بىرنەشە قادامداردىڭ ىسكە اسۋى ماڭىزدى. ماسەلەن، بالاما پىكىردى ايتاتىن وپپوزيتسيالىق قوزعالىستارعا زاڭ ارقىلى مۇمكىندىك بەرۋ. تىركەلۋگە، ساياسي الاڭداعى بەلسەندىلىگىن ىسكە اسىرۋعا، ءسوز بوستاندىعىنا، ءادىل سايلاۋ وتكىزۋگە. ونىڭ كەيبىر قادامدارىن ءبىز قازىر كورىپ تە جاتىرمىز. ساياسي پارتيالاردىڭ تىركەلۋىنە قاتىستى كەيبىر شەكتەۋلەردىڭ الىنۋى، بالاما ويداعى ازاماتتاردىڭ شەرۋ ۇيىمداستىرۋىنا جەڭىلدىكتەر بەرىلۋى وسىنىڭ كورىنىسى. ارينە اتتەگەن-اي دەيتىن تۇستارى دا بار. بىراق باستاماسى جامانى ەمەس.
اعىن ايدىن، "ادىرنا" ۇلتتىق پورتالى.
