تالدىقورعاندىق پوليتسەيلەر پىشاقتالعان قىزدىڭ ءىسى بويىنشا جازالاندى، - دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
"اتالعان فاكتى بويىنشا قىزمەتتىك تەرگەۋ جۇرگىزىلدى. ناتيجەسىندە تالدىقورعان قالالىق ءىىب-ءنىڭ بەس قىزمەتكەرى قاتاڭ تارتىپتىك جاۋاپكەرشىلىككە تارتىلدى. قازىرگى ۋاقىتتا تەرگەۋ امالدارى جۇرگىزىلۋدە. قىلمىستىق-پروتسەستىك كودەكستىڭ 201-بابىنا سايكەس سوتقا دەيىنگى تەرگەپ-تەكسەرۋ دەرەكتەرى جاريا ەتىلۋگە جاتپايدى»، - دەپ حابارلادى ءىىم ءباسپاسوز قىزمەتى.
بۇعان دەيىن «نە مولچي» قورى پوليتسەيلەرگە وقىرماندارىنىڭ بىرىنە جاسالعان سۇمدىق جايت تۋرالى بايانداعان بولاتىن. تالدىقورعاندا 35 جاستاعى ەر ازامات بۇرىنعى ارا-قاتىناستاعى قىزىن كەڭسە پىشاعىن تىلگىلەپ تاستاعان بولاتىن.
ء"وزىڭىز ەلەستەتىپ كورىڭىزشى: ءسىزدى وتادان شىعارىپ، دالىزدە قالدىرىپ كەتەدى، ءوزىڭىز ءالى ناركوزدان ايىقپاعانسىز. ال ءسىزدى كوتەرىپ، بولىمشەگە جاۋاپ الۋ ءۇشىن الىپ كەتەدى. بۇل باسسىزدىق قوي. #نەمولچي قورى ىسكە قاتىسى بار بارلىق قىزمەتكەرلەردەن جاۋاپ تالاپ ەتەدى. وسى ەپيزود بويىنشا جاۋاپكەرشىلىككە تارتىلسىن ءبىز سىبايلاس جەمقورلىققا قارسى ءىس-قيمىل اگەنتتىگىنىڭ رەسمي جاۋابىن كۇتەمىز»، - دەلىنگەن قور حابارلاماسىندا.
الايدا جەتىسۋ وبلىستىق پوليتسيا دەپارتامەنتى قوردىڭ بۇل ايىپتاۋلارىن جوققا شىعاردى.
ەسكە سالا كەتەيىك، جەلىدە وقيعا ورنىنان ۆيدەو پايدا بولدى. جىگىت قىزعا شابۋىل جاساپ، ونى پىشاقپەن كەسكىلەپ تاستاعان. كەيىن جىگىتتىڭ ءبىر-ەكى كۇننەن كەيىن ۇيقاماققا شىعارىلىپ، «بۇزاقىلىق» بابى بويىنشا ءىس قوزعالعانى بەلگىلى بولدى. الايدا، قوعامدىق نارازىلىقتان كەيىن ول قاماۋعا الىنىپ، ءىس «كىسى ولتىرۋگە وقتالۋ» دەپ وزگەرتىلدى.
