نازارباەۆ: قازاق ءدال بۇگىنگىدەي ءومىردى ەشقاشان كورگەن جوق

3010
Adyrna.kz Telegram

ەلباسى مالىمدەگەندەي، تاۋەلسىزدىكتىڭ قانداي قيىنشىلىقپەن كەلگەنىن بىلمەيتىن جاستار ازات وتانىنان ايىرىلىپ قالاتىنىن تۇسىنە بەرمەيدى

 قازىر ەلىمىزدىڭ بايلىعىنا قىزىعاتىندار ىشىمىزگە ىرىتكى سالۋ ءۇشىن قولجاۋلىق بولاتىنداردى ىزدەيدى. وكىنىشكە قاراي، وندايلار تابىلادى. قازاقستانعا تونەتىن ەڭ ۇلكەن قاۋىپ وسى. بۇل تۋرالى ەلباسى نۇرسۇلتان نازارباەۆ 21 ماۋسىمدا وتكەن "كەمەڭگەرلىكتىڭ 30 جىلى" اتتى حالىقارالىق عىلىمي-پراكتيكالىق كونفەرەنتسيادا ايتتى، دەپ حابارلادى اقوردا.

نازارباەۆ اتاپ وتكەندەي، قازاق حالقى بىرلىكتىڭ ارقاسىندا جاۋلارىن جەڭىپ، ەلى مەن جەرىن ساقتاپ قالعان.

"قازاقتى باعىندىرىپ، بودان ەتۋ ءۇشىن حاندىعىن تارتىپ الىپ، جۇزگە، رۋعا ءبولىنۋىن ايلاكەرلىكپەن پايدالانعان. قازىر دە ەلىمىزدىڭ تابىستارىن كورە المايتىن، بايلىعىمىزعا قىزىعاتىندار از ەمەس", - دەدى ول.

ەلباسى ولار ىشىمىزگە ىرىتكى سالۋ ءۇشىن قولجاۋلىق بولاتىنداردى، جەتەككە ەرەتىندەردى ىزدەيتىنىن جەتكىزدى.

"وكىنىشكە قاراي، وندايلاردى تابادى. بۇل باياعى ء"بولىپ ال دا، بيلەي بەر" دەيتىن جىمىسقى ساياسات. بىزگە تونەتىن ەڭ ۇلكەن قاۋىپ وسى. تاۋەلسىزدىكتىڭ قانداي قيىنشىلىقپەن كەلگەنىن زەرتتەمەيتىن، بىلمەيتىن جاستار بۇگىنگى ەركىن كۇنىنەن، ازات وتانىنان ايىرىلىپ قالاتىنىن تۇسىنە بەرمەيدى", - دەپ تولىقتىردى ول.

تۇڭعىش پرەزيدەنتتىڭ پىكىرىنشە، مەملەكەت بۇعان جول بەرمەۋى قاجەت. بۇكىل حالىق بولىپ بىرلىكتى، تىنىشتىقتى قولداۋ كەرەك.

"قازاق ءدال بۇگىنگىدەي ءومىردى ەشقاشان كورگەن جوق. ايىرىلىپ قالمايىق. مەنىڭ ەلىمە ايتاتىن نەگىزگى وسيەتىم وسى. ۇلى ابايدىڭ ء"بىرىڭدى، قازاق، ءبىرىڭ دوس كورمەسەڭ – ءىستىڭ ءبارى بوس" دەگەنى دە وسى بولار. ۇمىتپايىق", - دەپ اتاپ ءوتتى ەلباسى.

نازارباەۆ حالىق پەن پرەزيدەنت ءاردايىم بىرگە ەكەنىن ايتا كەلە، الدىڭعى تولقىن – اعا بۋىنعا ءسوز ارنادى.

"سىزدەر پايىم-پاراساتتارىڭىز بەن كورەگەندىكتەرىڭىزگە سۇيەنىپ، جاستارعا دۇرىس باعىت-باعدار بەرۋلەرىڭىز كەرەك. ولار وتاندى ءسۇيۋدىڭ، مەملەكەتتى نىعايتۋدىڭ، تاۋەلسىزدىكتى قورعاۋدىڭ جانە جارقىن بولاشاق ءۇشىن جۇمىس ىستەۋدىڭ ماڭىزدىلىعىن جەتە تۇسىنۋگە ءتيىس", - دەپ تۇيىندەدى نازارباەۆ.

Sputnik.

پىكىرلەر