ۇبت تاپسىرىپ شىققان ءبىر بالا ايتىپ جاتىر: "ەكى سمارتفون الىپ كىرگەنمىن. پايداسى ءتيدى. اپايلار مەن اعايلار جىبەرگەن سۇراقتىڭ جاۋاپتارىن تۇگەل تولتىردىم. 100-دەن استام بالل الاتىن شىعارمىن" - دەيدى. مۇنى كىمگە ايتىپ تۇر دەيسىز عوي. تەلەارنا تىلشىسىنە بەرگەن سينحرونى ارقىلى ءدۇيىم جۇرتقا جاريالاپ تۇر. ول بالانىڭ ويىنشا ۇبت تاپسىرۋ دەگەن ەشقانداي دا سىناق ەمەس ەكەن. ول بىرەۋلەردىڭ كومەگى ارقىلى كوشىرىپ العان ۇپايىمەن مەملەكەتتىك ءبىلىم گرانتىنا قول جەتكىزۋ عانا. مۇنداي ۇرلىقي تاسىلدەرمەن وقۋ تۇسۋدەن جاس تۇلەكتەر دە، ولارعا قىزمەت كورسەتىپ جاۋاپ جىبەرىپ وتىرعان ۇستازدارى قىسىلىپ-قىمتىرىلۋدى، ۇيالىپ-قىزارۋدى قويىپتى. جالپى، ءبىزدىڭ قوعام ار-ۇيات دەگەن دۇنيەنى الدەقاشان ىسىرىپ تاستاپ، قانداي كەلەڭسىزدىككە بولسىن، كوز جۇما قارايتىن بولىپتى. ال، جوو-نا وسىلاي تۇسكەن بالا ەرتەڭگى كۇنى قالاي وقيتىنى بەلگىلى. ديپلوم الىپ شىعاتىنى ايدان انىق. ونىڭ وزىندە جاي ەمەس، قىزىل ديپلوم الادى. بىراق، ءبىلىم المايدى. "ەسەكتىڭ قۇلاعىنا سۋ قۇيساڭ دا، باسىن شايقايدى، التىن قۇيساڭ دا باسىن شايقايدى" دەگەننىڭ كەرى. ۇبت - بالالاردىڭ ءبىلىمىن ءوستىپ سىناقتان وتكىزىپ، ەلىمىزدىڭ ماڭداي الدى دەلىنگەن ۋنيۆەرسيتەتتەرى ءبىلىم گرانتىن يەلەنگەن وسىنداي جاستاردى قابىلداپ جاتىر. ءىشىنارا تاۋىرلەرى دە بار شىعار، دەگەنمەن ۇبت سۇراقتارىنىڭ ءوزى تەرەڭ بىلىمدىلىكتى ايشىقتايتىن تالاپقا ساي سىناق ەمەس. ونىڭ ىشىندە وقۋشىنىڭ تانىمى مەن بىلىمىنە ولشەم بولارلىقتاي لوگيكالىق سۇراقتىڭ ءوزى نەكەن ساياق. ءبارى دەرلىك جاتتاۋعا ارنالعان قۇرعاق دەرەكتەر مەن ماڭىزى تومەن بىردەمەلەر. جاراتىلىس عىلىمدارى ءۇشىن قولايلى شىعار، بىراق، گۋمانيتارلىق پاندەرگە ءبىزدىڭ ۇبت تولىقتاي ولشەم بولا الماي-اق قويدى. سوندىقتان دا شىعار، جۇرت ۇبت-نى سوزجۇمباق نەمەسە لوتەرەيا بيلەتىنە كوبىرەك ۇقساتادى. ونىسى، كەزدەيسوقتىق ەمەس.
قۋاندىق شاماحايۇلى
