UBT tapsyryp shyqqan bir bala aıtyp jatyr: "Eki smartfon alyp kirgenmin. Paıdasy tıdi. Apaılar men aǵaılar jibergen suraqtyń jaýaptaryn túgel toltyrdym. 100-den astam ball alatyn shyǵarmyn" - deıdi. Muny kimge aıtyp tur deısiz ǵoı. Telearna tilshisine bergen sınhrony arqyly dúıim jurtqa jarııalap tur. Ol balanyń oıynsha UBT tapsyrý degen eshqandaı da synaq emes eken. Ol bireýlerdiń kómegi arqyly kóshirip alǵan upaıymen memlekettik bilim grantyna qol jetkizý ǵana. Mundaı urlyqı tásildermen oqý túsýden jas túlekter de, olarǵa qyzmet kórsetip jaýap jiberip otyrǵan ustazdary qysylyp-qymtyrylýdy, uıalyp-qyzarýdy qoıypty. Jalpy, bizdiń qoǵam ar-uıat degen dúnıeni áldeqashan ysyryp tastap, qandaı keleńsizdikke bolsyn, kóz juma qaraıtyn bolypty. Al, JOO-na osylaı túsken bala erteńgi kúni qalaı oqıtyny belgili. Dıplom alyp shyǵatyny aıdan anyq. Onyń ózinde jaı emes, qyzyl dıplom alady. Biraq, bilim almaıdy. "Esektiń qulaǵyna sý quısań da, basyn shaıqaıdy, altyn quısań da basyn shaıqaıdy" degenniń keri. UBT - balalardyń bilimin óstip synaqtan ótkizip, elimizdiń mańdaı aldy delingen ýnıversıtetteri bilim grantyn ıelengen osyndaı jastardy qabyldap jatyr. Ishinara táýirleri de bar shyǵar, degenmen UBT suraqtarynyń ózi tereń bilimdilikti aıshyqtaıtyn talapqa saı synaq emes. Onyń ishinde oqýshynyń tanymy men bilimine ólshem bolarlyqtaı logıkalyq suraqtyń ózi neken saıaq. Bári derlik jattaýǵa arnalǵan qurǵaq derekter men mańyzy tómen birdemeler. Jaratylys ǵylymdary úshin qolaıly shyǵar, biraq, gýmanıtarlyq pánderge bizdiń UBT tolyqtaı ólshem bola almaı-aq qoıdy. Sondyqtan da shyǵar, jurt UBT-ny sózjumbaq nemese lotereıa bıletine kóbirek uqsatady. Onysy, kezdeısoqtyq emes.
Qýandyq Shamahaıuly
