2019 جىلدىڭ 24 ماۋسىم كۇنى نۇر-سۇلتان قالاسىندا حالىقارالىق تۇركى اكادەمياسىنىڭ ۇيىمداستىرۋىمەن
«ۇلى دالا» IV گۋمانيتارلىق عىلىمدار فورۋمى وتەدى
بيىلعى جيىن «تۇركى وركەنيەتى: ءتۇپ تامىرىنان قازىرگى زامانعا دەيىن» دەگەن تاقىرىپقا ارنالىپ وتىر. فورۋمدا قازاقستاندىق عالىمدارمەن قوسا ەۋروپا، ازيا جانە امەريكا قۇرلىعىنىڭ 21 ەلىنەن 250 – گە جۋىق تانىمال عالىمدار مەن بەلگىلى مەملەكەت جانە قوعام قايراتكەرلەرى باس قوسپاق. فورۋمعا موڭعوليانىڭ تۇڭعىش پرەزيدەنتى پۋنسالمااگين وچيربات، ازەربايجان رەسپۋبليكاسىنىڭ تۇڭعىش پرەمەر-ءمينيسترى گاسان گاسانوۆ، قىرعىزستان رەسپۋبليكاسى پرەزيدەنتىنىڭ كەڭەسشىسى سۋلتان راەۆ، تۇركيا رەسپۋبليكاسى پارلامەنتىنىڭ ەكس-دەپۋتاتى جانە بەلگىلى ساياساتكەر نامىك كەمال زەيبەك پەن قىرعىزستان رەسپۋبليكاسى جوعارعى كەڭەسىنىڭ تۇڭعىش توراعاسى مەدەتكان شەريمكۋلوۆ ارنايى كەلدى.
فورۋم «تۇركى مەملەكەتتىگىنىڭ قالىپتاسۋ مەن دامۋ تاريحى»، «تۇركى الەمىنىڭ گەنەزيسى - ۇلى دالا تاريحىنداعى جاڭا ءداۋىر»، «تۇركى الەمىنىڭ ادەبيەتى مەن فولكلورتانۋىنداعى وزەكتى ماسەلەلەر»، «تۇركى الەمىنىڭ ەتنومادەني ەرەكشەلىكتەرى»، «قازىرگى تۇركىتانۋ: جاڭا كوزقاراستار مەن تاسىلدەر» جانە «ەۋرازياداعى ينتەگراتسيالىق ۇردىستەر: كەڭىستىك پەن ۋاقىتتىڭ كوكجيەكتەرى» دەگەن 6 تاقىرىپتىق سەكتسياعا بولىنگەن.
حالىقارالىق جيىننىڭ باستى مىندەتى - شەت ەلدىك جانە وتاندىق تۇركولوگ عالىمدار اراسىندا الەمدىك تۇركىتانۋ عىلىمىنىڭ قازىرگى جاعدايىنا، جەتىستىكتەرىنە، پروبلەمالارى مەن دامۋ كەلەشەگىنە تالداۋ جاساۋ، ۇلى دالانىڭ مادەني قۇندىلىقتارىنىڭ ادامزات وركەنيەتىنىڭ دامۋىنداعى ءرولى مەن ماڭىزىن تالقىلاۋ. سونداي-اق، قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ «ۇلى دالانىڭ جەتى قىرى» باعدارلامالىق ماقالاسى نەگىزىندە تۇجىرىمدالعان ستراتەگيالىق ماقساتتار شەڭبەرىندە تۇركى الەمى مادەني قۇندىلىقتارىنىڭ جالپى ادامزاتتىق ماڭىزى مەن رولىنە تالداۋ جۇرگىزىپ، تالقىلاۋ فورۋمنىڭ الدىنا قويعان باستى ماقساتى.
حالىقارالىق باسقوسۋ الەمدىك تانىمال ماماندار اراسىنداعى عىلىمي بايلانىستاردى نىعايتۋ، پىكىر الماسۋ، جاھاندىق جانە وڭىرلىك دەڭگەيدەگى وزەكتى ماسەلەلەردى شەشۋ بويىنشا كەڭەستەر ۇسىناتىن الاڭ قىزمەتىن اتقارماق.
فورۋم جۇمىسىنىڭ قورىتىندىسى بويىنشا مىناداي ناقتى ناتيجەلەر كۇتىلۋدە:
⦁ قازاقستان جانە تۇركى تىلدەس مەملەكەتتەردىڭ قوعامدىق ساناسىن جاڭعىرتۋدىڭ وزەكتى باعىتتارى بويىنشا زەرتتەۋ فورماتتارىن ناقتى بەلگىلەۋ;
⦁ قازىرگى تۇرك الەمىنە قاتىستى جاڭا زەرتتەۋلەردىڭ دامۋىنا اسەر ەتەتىن اعىمداردى زەردەلەۋ، سونداي-اق تۇركولوگيا جانە الەۋمەتتىك عىلىمداردىڭ باسقا پاندەرىن قامتيتىن وبەكتيۆتى كوزقاراستاردى انىقتاۋ;
⦁ ءوزارا تۇسىنىستىك پەن كونسترۋكتيۆتى ىنتىماقتاستىقتى نىعايتۋدا عىلىمنىڭ ينتەگراتسيالىق الەۋەتىن قابىلداۋ نەگىزىندە ءتيىستى قورىتىندى قارار قابىلداۋ.
وتەتىن ۋاقىتى: 24 ماۋسىم 2019 جىل، ساعات 09.30-دا
وتەتىن جەرى: "St. Regis Astana" قوناقۇيى، "تۇلپار" زالى،
قابانباي باتىر داڭعىلى، 1, نۇر-سۇلتان قالاسى.
حالىقارالىق تۇركى اكادەمياسىنىڭ
ءباسپاسوز قىزمەتى
+7/7172/574983
+77711019232
Sayat858@mail.ru
