قازاقستان مۇسىلماندارى ءدىني باسقارماسى «يمام» جولاۋشى مەن تاكسيشى اراسىندا بولعان جانجالعا قاتىستى مالىمدەمە جاسادى، دەپ حابارلايدى «ادىرنا» ءتىلشىسى.
بۇعان دەيىن الەۋمەتتىك جەلىدە تاكسي جۇرگىزۋشىسى مەن ەر ادامنىڭ جانجالداسىپ جاتقان ۆيدەوسى تاراعان ەدى. جەلى قولدانۋشىلارى «اللاھۋ اكبار، اۋدارىلىپ قال!» دەگەن اۋىر ءسوزدى ايتقان ادام گۇلدالا اۋىلىنداعى مەشىتتىڭ يمامى ەكەنىن جازعان بولاتىن.
الايدا ءمۇفتيات بۇل اقپاراتتى جوققا شىعاردى.
«بۇقارالىق اقپارات قۇرالدارى مەن الەۋمەتتىك جەلىلەردە باحتيار جاقسىلىقوۆ ەسىمدى ازاماتتىڭ تاكسي جۇرگىزۋشىسىمەن كيكىلجىڭگە كەلىپ، دورەكى ارەكەت كورسەتكەنى جانە ونىڭ «يمام» ەكەنى تالقىلانۋدا.
وسى ورايدا باحتيار جاقسىلىقوۆتىڭ قازاقستان مۇسىلماندارى ءدىني باسقارماسىنىڭ قىزمەت جۇيەسىندە جۇمىس ىستەمەيتىنىن رەسمي تۇردە مالىمدەيمىز. سونداي-اق بۇقارالىق اقپارات قۇرالدارى وكىلدەرى مەن الەۋمەتتىك جەلى قولدانۋشىلارىنان انىقتالماعان حاباردى تاراتپاۋىن سۇرايمىز»،—دەلىنگەن حابارلامادا.
