مەكتەپ وقۋشىلارىنا ساباق ۇستىندە تەلەفون ۇستاۋعا بولمايدى. بۇل تۋرالى پارلامەنت سەناتى بۇگىن ءتيىستى زاڭدى ماقۇلداپ، پرەزيدەنتتىڭ قول قويۋىنا جىبەردى. , دەپ حابارلايدى “ادىرنا” ۇلتتىق پورتالى.
"وقۋ پروتسەسىندە ۇيالى تەلەفونداردى پايدالانۋعا شەك قويۋدى ەنگىزۋ، تەستىلەۋسىز ءبىرىنشى سىنىپقا قابىلداۋ، بالاباقشالارعا ورىن بەرۋ بويىنشا بىرىڭعاي كەزەكتى قامتاماسىز ەتۋ، ءبىلىم بەرۋ ۇيىمدارىندا زورلىق-زومبىلىقتى ناسيحاتتايتىن، ءدىني سيپاتتاعى اقپاراتتىڭ تارالۋىنا جول بەرمەۋ جانە سۋيتسيدكە شاقىرۋدى بولدىرماۋ شارالارىن قابىلداۋدى كوزدەيتىن نورمالار ۇسىنىلعان", - دەدى سەنات دەپۋتاتى التىنبەك نۇحۇلى.
سەنات دەپۋتاتىنىڭ ايتۋىنشا، زاڭدا وقۋشىلارعا ساباق كەزىندە ۇيالى تەلەفوندى پايدالانۋعا شەكتەۋ قويۋ تۋرالى نورما بار. ءۇزىلىس كەزىندە تەلەفوندى ۇستاۋعا بولادى.
سونداي-اق بالالاردىڭ قاۋىپسىزدىگى ءۇشىن تەرەزەلەردى قاۋىپسىزدىك قۇلىپتارىمەن قامتاماسىز ەتۋ قاجەتتىلىگى تۋرالى نورما دا بار.
ەگەر مەكتەپتە ارنايى ۇياشىقتار بولسا، وقۋشى ساباق كەزىندە تەلەفونىن سوندا قويادى. ەگەر ونداي جاعداي جاسالماسا، تەلەفونىن سومكەسىنە سالادى.
«ءبىلىم ساپاسىن ارتتىرۋ ءۇشىن وسىنداي نورما ارنايى قابىلدانىپ وتىر»، دەدى وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلداەۆا.
