وبلىس اكىمى نۇرلىبەك نالىباەۆ ءبىلىم بەرۋ ۇيىمدارىنىڭ جاي-كۇيى تۋرالى كەڭەيتىلگەن ماجىلىستە بيىلدان باستاپ ءوڭىردىڭ بارلىق ەلدى مەكەنىندەگى كلۋبتار مەن مادەنيەت ۇيلەرىنەن جاس ۇرپاقتى وتانشىلدىق جانە مەملەكەتشىلدىككە، پاتريوتتىققا تاربيەلەيتىن ۇيىرمەلەرى بار «ادال ادام» رۋحاني-مادەني ورتالىقتارى اشىلاتىنىن ايتتى. بۇل ورتالىقتاردا بالالاردىڭ قابىلەتى شىڭدالادى، سىرداريالىق جاس ونەرتاپقىش اسىلجان ابدۋللاەۆ، باتىر جەتكىنشەك ارمان امانجولوۆتاي پاتريوتتاردىڭ ۇلگىسى ناسيحاتتالادى.
«كۇنى كەشە رەسپۋبليكالىق تەلەارنالاردان سىرداريا اۋدانىنىڭ 11-سىنىپ وقۋشىسى اسىلجان ابدۋللاەۆتىڭ جاساندى ينتەللەكتتى العاش بولىپ قازاقشا سويلەتكەنى تۋرالى اقپارات جاريالاندى. اۋىل بالاسىنىڭ ۇشى-قيىرى جوق عالامتور كەڭىستىگىنە جاڭاشىلدىق اكەلگەنى كوپتى تاڭ قالدىردى. مەكتەپتى بيىل ءتامامدايتىن جاس تەحنوكراتقا قازىردىڭ وزىندە ەلىمىزدەگى 3 جوعارى وقۋ ورنى – استانا ءىت ۋنيۆەرسيتەتى، سەۋلتەح ۋنيۆەرسيتەتىنىڭ قىزىلوردا قالاسىنداعى فيليالى، قورقىت اتا اتىنداعى قىزىلوردا ۋنيۆەرسيتەتى گرانت ۇسىنۋدا.
بۇگىنگىدەي مۇمكىندىكتەر داۋىرىندە ءبىزدىڭ جەتكىنشەكتەرىمىزدىڭ جارقىراي كورىنەتىنىنە، بيىكتەرگە ۇمتىلاتىنىنا ۇستازدار دا، اتا-انالار دا، ءبارىمىز سەنىم ارتامىز، قولداۋ كورسەتەمىز.
بارلىق بالا اسىلجانداي جاس ونەرتاپقىشقا، قىزىلوردا قالاسىندا قۇدىققا تۇسكەن ەكى جاسار ءسابيدى قۇتقارىپ قالعان ارمان امانجولوۆتاي پاتريوت ۇلدارىمىزعا قاراپ، بوي تۇزەۋى كەرەك»، – دەدى نۇرلىبەك ماشبەكۇلى.
وبلىس اكىمى جاسوسپىرىمدەر ءتارتىبى ماسەلەسىنە توقتالىپ، قىلمىستىڭ الدىن الۋ جانە بولدىرماۋعا قاتىستى ءىس-شارالاردى جانداندىرۋدى تالاپ ەتتى.
«ءبىلىم وشاقتارىندا قىلمىستىق پسيحولوگيانىڭ تارالۋىن، كامەلەتكە تولماعانداردىڭ قاتىسۋىمەن جاسالاتىن كەلەڭسىزدىكتەردى تۇبىرىمەن جويۋىمىز قاجەت. سوندىقتان وسى جيىنعا وبلىستىق پوليتسيا دەپارتامەنتى ارنايى شاقىرىلدى. مەملەكەت باسشىسى: «بالالار اراسىندا جالپىادامزاتتىق جانە ۇلتتىق قۇندىلىقتاردى دارىپتەگەن ابزال. وقۋشىلار مەكتەپ بىتىرگەندە، ەڭ الدىمەن، ادال ازامات بولىپ شىعۋى كەرەك»، – دەدى.
بۇگىنگى ماجىلىسكە ءار اۋداننان ارداگەرلەر، قوعامدىق كەڭەس، ايەلدەر كەڭەسى توراعالارى مەن وكىلدەرى ارنايى شاقىرىلدى. بالا تاربيەسىنە تەك اتا-انا، مۇعالىم عانا ەمەس، قوعام بولىپ اتسالىسۋىمىز كەرەك. وقۋشىلار مەن جاستارىمىزعا زيالى قاۋىمنىڭ، اقساقال-ابىزدارىمىزدىڭ ءسوزى ءوتىمدى بولۋى ءتيىس. بۇرىنعىدان بىزگە جەتكەن «جاستاي بەرگەن تاربيە – جاس شىبىقتى يگەندەي» دەگەن ءسوز بار. بۇزاقىلىقتىڭ سەبەبىنىڭ ءبىرى – بوس ۋاقىتتىڭ كوپ بولۋىندا. يۋۆەنالدى پوليتسيا بولىمشەسى جۇمىسىنىڭ تيىمدىلىگىنە جان-جاقتى تالداۋ جاسالۋ كەرەك»، – دەدى ن.نالىباەۆ.
ەسكە سالساق، وتكەن جىلدىڭ اقپان ايىندا «وتباسى – تاربيە بەسىگى» تاقىرىبىندا وبلىستىق اتا-انالار كەڭەسى وتكىزىلدى. بۇل جۇمىستار قالا، اۋدان، اۋىلداردا جالعاسىن تاپتى. دەگەنمەن، ازىرگە ناتيجە كوڭىل كونشىتپەيتىنىن اتاپ وتكەن ايماق باسشىسى وسى باعىتتا ءارى قاراي دا شارالار قابىلداۋ قاجەتتىگىن قاپەرگە سالدى.
