Oblys ákimi Nurlybek Nálibaev bilim berý uıymdarynyń jaı-kúıi týraly keńeıtilgen májiliste bıyldan bastap óńirdiń barlyq eldi mekenindegi klýbtar men mádenıet úılerinen jas urpaqty otanshyldyq jáne memleketshildikke, patrıottyqqa tárbıeleıtin úıirmeleri bar «Adal adam» rýhanı-mádenı ortalyqtary ashylatynyn aıtty. Bul ortalyqtarda balalardyń qabileti shyńdalady, syrdarııalyq jas ónertapqysh Asyljan Abdýllaev, batyr jetkinshek Arman Amanjolovtaı patrıottardyń úlgisi nasıhattalady.
«Kúni keshe respýblıkalyq telearnalardan Syrdarııa aýdanynyń 11-synyp oqýshysy Asyljan Abdýllaevtyń jasandy ıntellektti alǵash bolyp qazaqsha sóıletkeni týraly aqparat jarııalandy. Aýyl balasynyń ushy-qıyry joq ǵalamtor keńistigine jańashyldyq ákelgeni kópti tań qaldyrdy. Mektepti bıyl támamdaıtyn jas tehnokratqa qazirdiń ózinde elimizdegi 3 joǵary oqý orny – Astana IT ýnıversıteti, SeýlTeh ýnıversıtetiniń Qyzylorda qalasyndaǵy fılıaly, Qorqyt Ata atyndaǵy Qyzylorda ýnıversıteti grant usynýda.
Búgingideı múmkindikter dáýirinde bizdiń jetkinshekterimizdiń jarqyraı kórinetinine, bıikterge umtylatynyna ustazdar da, ata-analar da, bárimiz senim artamyz, qoldaý kórsetemiz.
Barlyq bala Asyljandaı jas ónertapqyshqa, Qyzylorda qalasynda qudyqqa túsken eki jasar sábıdi qutqaryp qalǵan Arman Amanjolovtaı patrıot uldarymyzǵa qarap, boı túzeýi kerek», – dedi Nurlybek Mashbekuly.
Oblys ákimi jasóspirimder tártibi máselesine toqtalyp, qylmystyń aldyn alý jáne boldyrmaýǵa qatysty is-sharalardy jandandyrýdy talap etti.
«Bilim oshaqtarynda qylmystyq psıhologııanyń taralýyn, kámeletke tolmaǵandardyń qatysýymen jasalatyn keleńsizdikterdi túbirimen joıýymyz qajet. Sondyqtan osy jıynǵa oblystyq polıııa departamenti arnaıy shaqyryldy. Memleket basshysy: «Balalar arasynda jalpyadamzattyq jáne ulttyq qundylyqtardy dáriptegen abzal. Oqýshylar mektep bitirgende, eń aldymen, Adal azamat bolyp shyǵýy kerek», – dedi.
Búgingi májiliske ár aýdannan ardagerler, qoǵamdyq keńes, áıelder keńesi tóraǵalary men ókilderi arnaıy shaqyryldy. Bala tárbıesine tek ata-ana, muǵalim ǵana emes, qoǵam bolyp atsalysýymyz kerek. Oqýshylar men jastarymyzǵa zııaly qaýymnyń, aqsaqal-abyzdarymyzdyń sózi ótimdi bolýy tıis. Burynǵydan bizge jetken «jastaı bergen tárbıe – jas shybyqty ıgendeı» degen sóz bar. Buzaqylyqtyń sebebiniń biri – bos ýaqyttyń kóp bolýynda. Iývenaldy polıııa bólimshesi jumysynyń tıimdiligine jan-jaqty taldaý jasalý kerek», – dedi N.Nálibaev.
Eske salsaq, ótken jyldyń aqpan aıynda «Otbasy – tárbıe besigi» taqyrybynda oblystyq ata-analar keńesi ótkizildi. Bul jumystar qala, aýdan, aýyldarda jalǵasyn tapty. Degenmen, ázirge nátıje kóńil kónshitpeıtinin atap ótken aımaq basshysy osy baǵytta ári qaraı da sharalar qabyldaý qajettigin qaperge saldy.
