قازاقستاندا اۋەجاي ماڭىنداعى زاڭسىز عيماراتتار جاپپاي سۇرىلەدى. كولىك مينيسترلىگىنىڭ مالىمەتىنشە، بۇل شارالار اۋە كەمەلەرىنىڭ قاۋىپسىز ۇشىپ-قونۋىن قامتاماسىز ەتەدى، دەپ حابارلايدى “ادىرنا” ۇلتتىق پورتالى.
كتك تەلەارناسىنىڭ مالىمەتىنشە، مينيسترلىك اۋەجايعا تىم جاقىن سالىنعان عيماراتتاردىڭ سانىن انىقتاۋدى باستاپ كەتكەن. ەرەجەنى جان-جاقتى تالقىلاعان كوميسسيا مۇشەلەرى سۇرىلۋگە جاتاتىن نىسان قوجايىندارىنا قانشا وتەماقىنى بەرىلەتىنىن ءالى شەشپەپتى. سونداي-اق جاڭا وزگەرىستەر اۋەجاي ايماعىندا بيىك عيماراتتار مەن ەگىس القاپتارىنىڭ مۇلدەم بولماۋىن كوزدەيدى.
“اۋەجاي ماڭىندا اۋىل شارۋاشىلىق فەرمالارى، قۇس وسىرەتىن فابريكالار ورنالاسپاۋى ءتيىس. ياعني نىساننىڭ جۇمىسىنا ەشتەڭە كەدەرگى كەلتىرىلمەۋى كەرەك. سانيتارلىق-قورعانىس ايماعى بولىپ ەسەپتەلگەندىكتەن، بۇل ماڭدا جەر ءۇي قۇرىلىسىنا رۇقسات ەتىلمەيدى. قايتا-قايتا ۇشاقتاردىڭ ۇشۋىنان اۋاعا بولىنەتىن قالدىقتار اۋەجاي ماڭىندا تۇراتىن ادامداردىڭ دەنساۋلىعىنا كەرى اسەر ەتۋى مۇمكىن”، – دەدى "قازاقستاننىڭ اۆياتسيالىق اكىمشىلىگى" اق اەرودرومدار دەپارتامەنتىنىڭ ينسپەكتورى مۇحتاربەك تۇرلىبەكوۆ.
