مەملەكەت باسشىسى قاسىم-جومارت توقاەۆ باشقۇرتستان رەسپۋبليكاسىنىڭ باسشىسى رادي حابيروۆتى قابىلدادى، دەپ حابارلايدى "ادىرنا" ۇلتتىق پورتالى. بۇل تۋرالى قر پرەزيدەنتىنىڭ رەسمي سايتى مالىمدەدى.
قاسىم-جومارت توقاەۆ استانا مەن ماسكەۋدىڭ ەكىجاقتى بايلانىستارىن نىعايتۋعا وڭىرارالىق ىقپالداستىق ەلەۋلى ۇلەس قوسىپ وتىرعانىن اتاپ ءوتتى. وسى ورايدا باشقۇرتستان رەسپۋبليكاسى ەرەكشە ءرول اتقارادى. "قازاقستان مەن رەسەي اراسىنداعى جان-جاقتى قاتىناستارعا تىڭ سەرپىن بەرۋ تۇرعىسىنان العاندا بۇگىنگى ساپارىڭىزدىڭ ءمانى زور. ءبىز يندۋستريا، اگروونەركاسىپ كەشەنى جانە گۋمانيتارلىق سالالارداعى بايلانىستارىمىزدى ءارتاراپتاندىرۋ ءۇشىن بارىنشا كۇش سالامىز", – دەدى مەملەكەت باسشىسى. پرەزيدەنت بىرقاتار كەلىسىمنىڭ، سونىڭ ىشىندە ۇكىمەتتەر دەڭگەيىندە قول قويىلعان ىنتىماقتاستىقتىڭ 2023-2024 جىلدارعا ارنالعان جول كارتاسىنىڭ تابىستى جۇزەگە اسىرىلىپ جاتقانىنا نازار اۋداردى. ءوز كەزەگىندە رادي حابيروۆ قازاق جەرىندە قوناقجايلىق كورسەتكەنى ءۇشىن قاسىم-جومارت توقاەۆقا العىس ايتتى. "باشقۇرتستان مەن قازاقستان اراسىنداعى قارىم-قاتىناستى دامىتۋعا ەرەكشە ءمان بەرەتىنىڭىزدى بىلەمىز. مەنىمەن بىرگە ۇلكەن دەلەگاتسيا كەلدى. 2-3 جىلدىڭ ىشىندە ءبىز تاۋار اينالىمى مەن ونەركاسىپ كووپەراتسياسىنىڭ كولەمىن ايتارلىقتاي ۇلعايتتىق. بۇگىن «قازاقستان – باشقۇرتستان» فورۋمىن اشتىق. ءبىز ءۇشىن قازاقستان – ەڭ باستى سەرىكتەس. ءبىز مۇندا ءوزىمىزدى ەركىن سەزىنەمىز", – دەدى رادي حابيروۆ. كەزدەسۋدە ساۋدا-ەكونوميكالىق، مادەني-گۋمانيتارلىق، ونەركاسىپ جانە ءوزارا مۇددەنى كوزدەيتىن باسقا دا سالالارداعى ىنتىماقتاستىقتى جانداندىرۋعا باسا ءمان بەرىلدى.ۇقساس جاڭالىقتار
