9 قاڭتار كۇنى ادىرنا ۇلتتىق پورتالىندا "4 ملن 200 مىڭ تەڭگەلىك جاسىرىن تەندەر. اۋرۋحانا كۇنىنە 15 كارتريدجدى تولتىرا ما?" دەگەن ماقالا جاريالانعان ەدى. سول سىني ماتەريالعا قاتىستى ءتيىستءى مەكەمە جاۋاپ بەردى, - دەپ حابارلايدى ادىرنا ۇلتتىق پورتالىنىڭ ءتىلشىسءى.
اتالعان ماتەريالدا باتىس قازاقستان وبلىسىنىڭ اكىمدىگى دەنساۋلىق ساقتاۋ باسقارماسىنىڭ شارۋاشىلىق جۇرگىزۋ قۇقىعىنداعى وبلىستىق كوپ بەيىندى اۋرۋحاناسى 4 ملن 200 مىڭ تەڭگەلىك «2024 جىلعا ارنالعان كارتريدجدەردى تولتىرۋ قىزمەتى» دەگەن اتاۋمەن تەندەر وتكىزىپ جاتقانى، تەندەردىڭ حابارلاماسى 16 قاڭتاردان ءبىر اپتا بۇرىن جاريالانعانى سىنالعان ەدى.
سونداي-اق، تەحنيكالىق سيپاتتاماداعى «جانارماي قۇيۋعا ءوتىنىم بەرۋ جانە كارتريدجدەردى تولتىرۋ بويىنشا..." دەگەن سويلەمدى مىسال ەتە وتىرىپ: "جانارماي قۇيۋعا ءوتىنىم بەرۋ" دەگەن نە؟ اۋرۋحانا پرينتەرگە بەنزين قۇيماق پا؟" دەگەن ساۋالدار تۋىنداعان ەدى.
ماقالادا اۋرۋحانا ءبىر جىل ىشىندە 5 468 مارتە كارتريدج تولتىراتىنى, ار كارتريدجدى تولتىرۋ قۇنى شامامەن 769 تەڭگەگە باعالانعانى، بار بولعانى 30 ءتۇرلى پرينتەر ماركاسى كورسەتىلگەنى، 30 پرينتەرگە ءبىر جىلدا 5 468 مارتە كارتريدج تولتىرۋ اقىلعا سىيمايتىنى جازىلعان ەدى.
بۇل ماسەلەلەرگە قاتىستى بقو اكىمدىگى دسب شجق "وبلىستىق كوپبەيىندى اۋرۋحاناسى" جاۋاپ بەردى.
جاۋاپتا "مەملەكەتتىك ساتىپ الۋ تۋرالى" زاڭنىڭ 22-بابى 1-3-تارماعىنا سايكەس تەندەر حابارلاماسىن ءبىر اپتا بۇرىن جاريالاۋعا قۇقىلى ەكەندىكتەرىن، سوندىقتان ءوتىنىمدى جاسىرۋدىڭ ەشقانداي دا امالى جاسالماعانىن، ال "جانارماي قويۋعا ءوتىنىم بەرۋ" دەگەن جەردە اۋدارمادا قاتە كەتكەنىن، ويتكەنى اۋدارما اۋدارماشى ماماننىڭ كومەگىنسىز ونلاين-اۋدارماشى ارقىلى جۇزەگە اسىرىلعانىن" جازىپتى.
مەملەكەتتىك مەكەمەنىڭ مەملەكەتتىك ءتىلدى قۇرمەتتەمەي، نە سەبەپتى ونلاين-اۋدارماشىعا جۇگىنگەنىن مۇلدەم تۇسىندىرمەپتى...
ونىڭ ورنىنا "بۇل سويلەم "كارتريدجدەردى تولتىرۋعا ءوتىنىم بەرۋ" دەگەندى بىلدىرەدى، تەحنيكالىق سيپاتتامادا ورىس تىلىندە "توپليۆا" دەگەن ءسوز جوق، ياعني كارتريدجدەر بەنزينمەن تولتىرىلمايدى" دەپ ءتىلشىنى كىنالاعان. سوندا اۋرۋحانانىڭ لوگيكاسىنا سالساق، مەملەكەتتىك تىلدە اقپارات العىسى كەلگەن ءار ازامات مىندەتتى تۇردە ورىس تىلىنە جۇگىنۋى كەرەك پە؟
ۇزىن-سونار جاۋاپتا وبلىستىق اۋرۋحانادا 289 پرينتەر بار ەكەنى، ياعني 5468 كارتريدج: 289 پرينتەر = 1 پرينتەرگە جىلىنا 18 كارتريدجدى تولتىرۋ، سوندا شامامەن = ايىنا 1 پرينتەرگە 1-2 رەت كارتريدج تولتىرىلاتىنى ايتىلعان. اۋرۋحانادا 289 پرينتەردىڭ بار ەكەنى نەلىكتەن تەحنيكالىق سيپاتتامادا كورسەتىلمەگەنىن جانە تۇسىندىرمەگەن.
ءبىز اۋرۋحانا تەندەرىنىڭ اشىق، تەحنيكالىق سيپاتتامانىڭ دۇرىس بولعانىن قالايمىز! سوندىقتان، بۇل سىن ماتەريال بقو دەنساۋلىق باسقارماسىنا ساباق بولسا ەكەن دەيمىز!
قانات بىرلىكۇلى
ادىرنا ۇلتتىق پورتالى
