9 qańtar kúni Adyrna ulttyq portalynda "4 mln 200 myń teńgelik jasyryn tender. Aýrýhana kúnine 15 kartrıdjdi toltyra ma?" degen maqala jarııalanǵan edi. Sol synı materıalǵa qatysty tıisti mekeme jaýap berdi, - dep habarlaıdy Adyrna ulttyq portalynyń tilshisi.
Atalǵan materıalda Batys Qazaqstan oblysynyń ákimdigi densaýlyq saqtaý basqarmasynyń sharýashylyq júrgizý quqyǵyndaǵy Oblystyq kóp beıindi aýrýhanasy 4 mln 200 myń teńgelik «2024 jylǵa arnalǵan kartrıdjderdi toltyrý qyzmeti» degen ataýmen tender ótkizip jatqany, tenderdiń habarlamasy 16 qańtardan bir apta buryn jarııalanǵany synalǵan edi.
Sondaı-aq, tehnıkalyq sıpattamadaǵy «Janarmaı quıýǵa ótinim berý jáne kartrıdjderdi toltyrý boıynsha..." degen sóılemdi mysal ete otyryp: "Janarmaı quıýǵa ótinim berý" degen ne? Aýrýhana prınterge benzın quımaq pa?" degen saýaldar týyndaǵan edi.
Maqalada aýrýhana bir jyl ishinde 5 468 márte kartrıdj toltyratyny, ár kartrıdjdi toltyrý quny shamamen 769 teńgege baǵalanǵany, bar bolǵany 30 túrli prınter markasy kórsetilgeni, 30 prınterge bir jylda 5 468 márte kartrıdj toltyrý aqylǵa syımaıtyny jazylǵan edi.
Bul máselelerge qatysty BQO ákimdigi DSB ShJQ "Oblystyq kópbeıindi aýrýhanasy" jaýap berdi.
Jaýapta "Memlekettik satyp alý týraly" Zańnyń 22-baby 1-3-tarmaǵyna sáıkes tender habarlamasyn bir apta buryn jarııalaýǵa quqyly ekendikterin, sondyqtan ótinimdi jasyrýdyń eshqandaı da amaly jasalmaǵanyn, al "janarmaı qoıýǵa ótinim berý" degen jerde aýdarmada qate ketkenin, óıtkeni aýdarma aýdarmashy mamannyń kómeginsiz onlaın-aýdarmashy arqyly júzege asyrylǵanyn" jazypty.
Memlekettik mekemeniń memlekettik tildi qurmettemeı, ne sebepti onlaın-aýdarmashyǵa júgingenin múldem túsindirmepti...
Onyń ornyna "Bul sóılem "Kartrıdjderdi toltyrýǵa ótinim berý" degendi bildiredi, tehnıkalyq sıpattamada orys tilinde "toplıva" degen sóz joq, ıaǵnı kartrıdjder benzınmen toltyrylmaıdy" dep tilshini kinálaǵan. Sonda aýrýhananyń logıkasyna salsaq, memlekettik tilde aqparat alǵysy kelgen ár azamat mindetti túrde orys tiline júginýi kerek pe?
Uzyn-sonar jaýapta oblystyq aýrýhanada 289 prınter bar ekeni, ıaǵnı 5468 kartrıdj: 289 prınter = 1 prınterge jylyna 18 kartrıdjdi toltyrý, sonda shamamen = aıyna 1 prınterge 1-2 ret kartrıdj toltyrylatyny aıtylǵan. Aýrýhanada 289 prınterdiń bar ekeni nelikten tehnıkalyq sıpattamada kórsetilmegenin jáne túsindirmegen.
Biz aýrýhana tenderiniń ashyq, tehnıkalyq sıpattamanyń durys bolǵanyn qalaımyz! Sondyqtan, bul syn materıal BQO Densaýlyq basqarmasyna sabaq bolsa eken deımiz!
Qanat Birlikuly
Adyrna ulttyq portaly
