بيىل حالىقتىڭ الەۋمەتتىك وسال توپتارىنان 400 مىڭنان استام بالا ماتەريالدىق كومەكپەن قامتىلادى. اتا-انالار مەملەكەتتەن بەرىلەتىن اقشاعا مەكتەپ فورماسى مەن وقۋعا قاجەتتى قۇرال-جابدىقتاردى وزدەرى تاڭداپ ساتىپ الا الادى. بۇل تۋرالى بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى جولداس باتىرحان ايتتى، دەپ حابارلايدى “ادىرنا” ۇلتتىق پورتالى.
وقۋ-اعارتۋ مينيسترلىگىنىڭ اقپاراتىنشا، بيىل ءار وقۋشىعا كيىم، وقۋ قۇرالدارىن ساتىپ الۋعا ارنالعان قاراجاتتىڭ ەڭ تومەنگى مولشەرى – 40 567 تەڭگە. اقشا اتا-انالاردىڭ شوتىنا اۋدارىلادى.
قاراجات اتا-انالارعا بالالارمەن بىرگە مەكتەپ فورماسىن، اياق كيىمدى، كەڭسە تاۋارلارىن وزدەرى تاڭداپ الۋ ءۇشىن بەرىلەدى. قابىلدانعان وزگەرىستەر اتا - انالار مەن بالالارعا جەتكىزۋشىلەردى ءوز بەتىنشە تاڭداۋعا مۇمكىندىك بەرەدى، - دەيدىبالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى جولداس باتىرحان.
مۇقتاج وتباسىلارعا ماتەريالدىق كومەك كورسەتۋ جانە بالالاردى 100% قامتاماسىز ەتۋ ءۇشىن جالپىعا بىردەي مىندەتتى ورتا ءبىلىم بەرۋ قورى جۇمىس ىستەيدى.
"جالپىعا بىردەي وقىتۋ" قورى مىنا بالالارعا قارجىلاي كومەك كورسەتەدى:
- اتاۋلى الەۋمەتتىك كومەك الاتىن وتباسىلاردان شىققان بالالارعا;
- جان باسىنا شاققانداعى ورتاشا تابىسى ەڭ تومەنگى كۇنكورىس دەڭگەيىنەن تومەن وتباسىلاردان شىققان بالالارعا;
- جەتىم جانە اتا-اناسىنىڭ قامقورلىعىنسىز قالعان بالالارعا;
- توتەنشە جاعدايعا تاپ بولعان وقۋشىلارعا (سونىڭ ىشىندە اباي وبلىسىندا ورتتەن قازا تاپقان ورمانشىلاردىڭ بالالارى دا بار).
ەسكە سالا كەتەيىك، بىلتىر مەكتەپ جيىنتىعىن ساتىپ الۋ سوماسى 17 مىڭ تەڭگەدەن باستالعان بولاتىن.
