5-shi Dúnıejúzilik kóshpendiler oıyndary qarsańynda Qazaqstan Respýblıkasynyń Ulttyq sport qaýymdastyǵy jáne Qazaqstan Jazýshylar Odaǵy birlese otyryp qalamgerler arasynda «Qulager» respýblıkalyq ádebı baıqaýyn jarııalady.
Baıqaýdyń negizgi maqsaty – ulttyq sportty nasıhattaý jáne qalamgerlerge qoldaý kórsetý, olardy ulttyq sport túrleri týraly jańa týyndylardy jazýǵa yntalandyrý.
Osyǵan oraı Almatydaǵy Qazaqstan Jazýshylar odaǵynda ótken jıynda ádebı baıqaý resmı túrde jarııalandy. Kezdesýge Qazaqstan Jazýshylar odaǵy basqarmasynyń tóraǵasy Mereke Qulkenov, Ulttyq sport Qaýymdastyǵynyń prezıdenti Islambek Saljanov, sondaı-aq Asanáli Áshimov, Dýlat Isabekov, Smaǵul Elýbaı, Beksultan Nurjekeev, Qanaz Moldahmetsyndy zııaly qaýym ókilderi men qoǵam qaıratkerleri qatysty. Sonymen qatar, búkil álemdi tańqaldyryp júrgen, qazaqtan shyqqan halyqaralyq dárejedegi tuńǵysh shabandoz Baýyrjan Myrzabaev sharanyń qurmetti qonaǵy boldy.
Qazaqstan Jazýshylar odaǵy basqarma tóraǵasy Mereke Qulkenov kórkem ádebıette ulttyq múddege saı keletin týyndylardyń úlesin arttyrý qajet ekenin atap ótti.
«Ónerdiń ishindegi eń bir qasterlisi – kórkem ádebıet. Sondyqtan shyǵarmashylyq zııaly qaýym, jazýshy qaýym ókilderi úshin «Qulager» ádebı baıqaýynyń mańyzy zor. Óskeleń urpaqtyń kitap oqýǵa degen qyzyǵýshylyǵyn oıatýǵa bar kúsh-jigerimizdi salamyz», - dedi Mereke Qulkenov.
Ulttyq sport qaýymdastyǵynyń prezıdenti Islambek Saljanov respýblıkalyq ádebı baıqaýdyń mańyzyna toqtaldy.
«Memleket basshysy Qasym-Jomart Kemeluly Toqaev ulttyq ıdeologııa men jańa qoǵamdyq etıkany qalyptastyrýǵa bas nazar aýdarǵany belgili. Bul rette bıyl ótetin 5-shi Dúnıejúzilik kóshpendiler oıyndary qarsańynda qalamgerler arasynda «Qulager» respýblıkalyq baıqaýynyń jarııalanýy qýanyshty jańalyq. Árıne, baıqaý ataýy kezdeısoq tańdalmaǵany belgili. Óıtkeni Ilııas Jansúgirovtiń «Qulageri» – eshqashan eskirmeıtin, máńgi jas poezııa. Qazaq ádebıetine jańa esimder men tyń týyndylar qosylyp, ulttyq ádebıetimizdi baıyta túsedi degen senimdemin», - dedi Islambek Saljanov.
Sonymen qatar, Ulttyq sport qaýymdastyǵynyń prezıdenti «Qazaq ádebıeti» gazeti ujymyn basylymnyń 90 jyldyq mereıtoıymen quttyqtady.
Aıta keteıik, baıqaýǵa ótinim qabyldaý 2024 jylǵy 22 qańtar men 22 maýsym aralyǵynda ótedi.
Baıqaýǵa qatysatyn jumystar ulttyq sport túrlerine arnalýy shart. Konkýrstyq shyǵarmalar Ulttyq sport qaýymdastyǵy quramyna resmı túrde kiretin «Teńge Ilý», «Báıge», «Jamby atý», «Aýdaryspaq», «Kókpar», «Toǵyzqumalaq», «Qusbegilik», «Sadaq atý», «Asyq atý», «Joryq» sport túrlerin basty taqyryp etýi kerek. Sonymen qatar, qatysýshylardyń jasyna shekteý qoıylmaıdy.
Baıqaýda mynadaı nomınaııalar bolady:
1. Úzdik poezııa
2. Úzdik proza
3. Balalarǵa arnalǵan úzdik shyǵarma
4. Úzdik komıks
5. Úzdik drama
6. Úzdik derekti proza
7. Úzdik fantastıkalyq/mıfologııalyq shyǵarma
Baıqaýǵa buryn esh jerde jarııalanbaǵan, tek qana osy jylǵy qańtar men maýsym aralyǵynda jazylǵan jańa shyǵarmalar qabyldanady.
Ár nomınaııa boıynsha úzdik dep tanylǵan týyndynyń avtory jeńimpaz atanyp, oǵan «Qulager» baıqaýynyń avtorlyq músinshesi jáne Ulttyq sport qaýymdastyǵy 2 000 000 (eki mıllıon) teńge kóleminde qarjylaı syıaqy beriledi.
Jeńimpazdar qazylar alqasynyń sheshimimen anyqtalyp, tamyz aıynda marapattalady.
Baıqaýǵa qatysýǵa ótinim berý úshin http://qulager.ultsport.kz/ saıtynda saýalnamany toltyryp, shyǵarmany júkteý qajet. Tolyq aqparatty qulagerultsport@gmail.com elektrondyq poshtasy arqyly uıymdastyrý komıtetinen nemese kórsetilgen baılanys telefondary arqyly bilýge bolady: +7 700 098 2025 (Juldyz Orazymbet), +7 701 516 5584 (Hadısha Erseıtova).
