شىعىس قازاقستاندا بەلگىسىز جىرتقىش قوراداعى قويدى قىرىپ كەتكەن، دەپ حابارلايدى "ادىرنا" ءتىلشىسى Inbusiness.kz-كە سىلتەپ.
شىعىس قازاقستان سامار اۋدانىندا بەلگىسىز جىرتقىش ءبىر ءۇيدىڭ قوراداعى 15 قويىن قىرىپ كەتتى.
اۋدان اكىمدىگى مالعا شاپقان بەلگىسىز جىرتقىشتىڭ سىلەۋسىن بولۋى مۇمكىن دەپ بولجاۋدا. اۋدان اكىمىنىڭ ورىنباسارى:
بەلگىسىز جىرتقىش قوراعا ەسىكتىڭ ءتۇبىن قازىپ كىرگەن. سىلەۋسىن شىعار دەپ وتىرمىز. سەبەبى، قاسقىر بولسا قويلاردى جارىپ كەتەر ەدى، ال بۇل جىرتقىش تەك قانىن ءىشىپ كەتكەن. جارالى قويلار دا باۋىزدالدى. بارلىعى اۋىلدىڭ مال ولەكسەسىن كومۋگە ارنالعان ورىنعا كومىلەدى. سەبەبى جىرتقىشتىڭ سىلەكەيىندە ءتۇرلى قاۋىپتى اۋرۋلار بولۋى ىقتيمال. قازىرگى كەزدە اۋىلدىق وكرۋگ اكىمدىگى كەلتىرىلگەن شىعىندى ەسەپتەۋدە، – دەيدى.
ال مال يەسى قويلاردى قىرعان قاسقىرلار ەكەنىنە سەنىمدى.
تاڭەرتەڭ قوراعا كىرىپ كەلسەم، ءىشى قان-جوسا. مالدارىمىنىڭ ءبىرازى جەردە قىرىلىپ جاتىر. شوشىپ كەتتىم. اڭشىلار ءىزدى كوردى. اۋىلعا كىرگەن جانە شىققان ىزىنە دەيىن تاپتى. ولار قاسقىرلار دەيدى. شاماسى 3 باس جىرتقىش بولۋى كەرەك. ىشىندەگى بىرەۋىنىڭ ءىزى ۇلكەن، ال ەكەنۋىنىكى كىشكەنە. سوعان قاراعاندا بالالارى عوي دەيمىن. العاشىندا سىلەۋسىن دەپ ويلاعانبىز. بىراق اڭشىلار سىلەۋسىن ءبىر مەزەتتە بۇلاي قىرا المايدى دەيدى. بۇنداي جاعداي اۋىلدا ءبىرىنشى رەت بولىپ تۇر، – دەيدى كوكجوتا اۋىلىنىڭ تۇرعىنى.
اۋىل تۇرعىندارى دا ءوز بالالارىنىڭ قاۋىپسىزدىگىنەن الاڭدايتىنىن ايتتى.
