Semeıde 11 adam Ertis ózeninde sý deńgeıiniń kóterilýine baılanysty qaýipsiz jerge kóshirildi, dep habarlaıdy "Adyrna" tilshisi Qazaqparatqa siltep.
Semeı qalasy Beıbitshilik aralynda turatyn 11 adam evakýaııalandy. Sebebi Ertis ózeninde sý deńgeıi – 457 sm.
Beıbitshilik araly turǵyndarynyń qaýipsizdigin qamtamasyz etý maqsatynda TJD, jergilikti atqarýshy organ jáne 68303 áskerı bóliminiń qyzmetkerleri birlesip, 21 qańtarǵa qaraǵan túni bóget salý, ózen arnasyna sý burý úshin jol tósemin ashý jumystaryn júrgizdi.
«Túnde Beıbitshilik aralynan 11 adam, onyń ishinde 3 bala evakýaııalandy. Olar Semeı qonaq úıine ornalastyryldy. Azamattardy jergilikti atqarýshy organdar ystyq tamaqpen qamtamasyz etti. Úı janýarlary da qaýipsiz jerge jetkizilgen», - dep habarlady Abaı oblysynyń ákimdigi.
Degenmen, turǵyn úılerdi sý basý qaýpi joq. Quzyrly organ qyzmetkerleri ýchaskelerdi jiti baqylap, sý deńgeıine monıtorıng júrgizýde. Al Ertis ózeniniń sý deńgeıi árbir 2 saǵat saıyn ólshenýde.
