تالعاردا 3 ميلليارد تەڭگەگە سالىنعان ساپاسىز مەكتەپ تۇرعىنداردىڭ اشۋىن تۋعىزدى. بۇل تۋرالى Instagram-داعى kris_p_talgar پاراقشاسى جاريالادى، دەپ حابسرلايدى “ادىرنا” ۇلتتىق پورتالى.
تۇرعىندار BI Group كومپانياسى سالىپ جاتقان 1200 ورىنعا ارنالعان №25 قالالىق مەكتەپتىڭ ساپاسىنا نارازىلىق بىلدىرۋدە. ولاردىڭ ايتۋىنشا، جاڭا عيماراتتىڭ سمەتاسى 3 ميلليارد تەڭگە بولعانىمەن، ادامدار بالالارىن مۇندا جىبەرگىسى كەلمەيدى.
“بۇل جەرگە اكىمدىك ماقتانىپ كىمدى اكەلمەدى دەيسىز. بىرەگەي، زاماناۋي 1200 ورىندىق مەكتەپ، دەپ ءبوستى. ال قازىر وقۋشى جيناي الماي الەك. «ەرىكتى تۇردە مىندەتتەپ» 8- مەكتەپتىڭ باستاۋىش سىنىپ وقۋشىلارىن اۋىستىرۋ ارقىلى تولتىرماقشى. ال زاڭ بويىنشا بالاسى قاي مەكتەپكە باراتىنىن اتا-انانىڭ تاڭداۋعا قاقىسى بار”، – دەپ جازدى پابليك.
وسىنشاما قاراجات جۇمسالعان مەكتەپتىڭ قابىرعالارى قازىردە جارىلىپ، سىز تارتىپ، توبەسى وپىرىلىپ جاتىر. توبەنىڭ جۇقا بولعانى سونشا، ونىڭ ۇستىندە جۇرگەن جۇمىسشىلار ءبارىن مىجىپ كەتكەن. دەمەك، شاتىردان سۋ اعارى ءسوزسىز.
تۇرعىنداردىڭ ايتۋىنشا، سپورت الاڭدارى لاي، ياعني جاڭبىر جاۋعان سايىن سۋ باسىپ كەتەدى. بالالاردىڭ ويىن الاڭدارىنا رەزەڭكە توسەمەك تۇگىلى توسەگىش قۇيىلماعان. ال دارەتحاناسى بولسا دالادا ورنالاسقان.
«ال ول جاققا وقۋشىلار بارعاندا نە بولادى؟ ءتىپتى ەكى بۇكتەلىپ قالاتىن شىعار؟ ماسقارا!» – دەپ جازادى تالعارلىقتار.
ولار جاڭا مەكتەپتىڭ دارەتحاناسى سىرتتا بولعانىنا نارازى. دەگەنمەن، ولاردىڭ ايتۋىنشا، مەكتەپتىڭ ىشىندە دە اجەتحانالار بار.
سونىمەن قاتار، قالا تۇرعىندارىنىڭ مەكتەپ قولايسىز جەردە – ينكۋباتور اۋدانىندا، اينالما جولدىڭ بويىندا سالىنعانىنا دا كوڭىلدەرى تولمايدى. تۇرعىندار ول اۋدانعا قالادان جالعىز اۆتوبۋس قاتىنايتىنىن جازعان.
سونداي-اق اتا-انالار ءالى كۇنگە دەيىن وقۋ قاي تىلدە بولاتىن بىلمەي وتىر.
“تەك قازاق تىلىندە وقىتامىز دەيدى. سوسىن ورىستىلدىلەرگە ءالى دە ورىن بار دەيدى. قۇجاتتاردى قابىلداپ العان سوڭ، سەگىزىنشى مەكتەپكە بارىڭدار دەيدى. سونىمەن قاشان ءبارى تۇسىنىكتى بولادى؟ ەشىمنىڭ شارۋاسى جوق”، دەپ جازدى انالاردىڭ ءبىرى.
مەكتەپ وتكەن جىلى تاپسىرىلعان. الايدا قۇرىلىس كومپانياسى عيمارات 8 اي بوس تۇرىپ، ىشىندەگى سۋ كرانى اشىق قالعاندىقتان ىلعالدانىپ كەتكەنىن ايتقان.
تالعار اۋداندىق اكىمدىگى مەردىگەر كومپانيا جاڭا وقۋ جىلى باستالعانعا دەيىن بارلىق ولقىلىقتاردى تۇزەتەتىنىن حابارلادى.
”ادىرنا” ۇلتتىق پورتالى
