قازاقستاندىق تەلەجۇرگىزۋشى، مەديامەنەدجەر ۆلاديمير رەريح قايتىس بولدى، دەپ حابارلايدى "ادىرنا" ءتىلشىسى.
مەديامەنەدجەر 67 جاسىندا قايتىس بولدى. بۇل تۋرالى ونىڭ بۇرىنعى ايەلى، ارىپتەسى دانا نۇرجىگىت Instagram-دا حابارلادى.
ء"الىمنىڭ اكەسىمەن سوڭعى كەزدەسۋى ەكەن… ۆولوديا، ۆلاديمير، ۆلاديمير احماديانوۆيچ رەريح بۇگىن بەرليندە دۇنيەدەن وزدى…
ۇلدى بولدىق. تۇسىنىسپەگەن جەردەن مەن قازاقستاندا قالىپ، سەن گەرمانياعا كەتتىڭ. بىراق، سەن مەنىڭ تۇلعا بولىپ قالىپتاسۋىما، مامان بولىپ وسۋىمە، انا بولىپ بالا تاربيەسىندە نەگە ءمان بەرۋ كەرەكتىگىمە زور ىقپال ەتتىڭ، اقىلشىم، ساپالىلىق، دانالىق، ار، كاسىبيلىكتىڭ بيىك ولشەمى بولدىڭ. پاراساتىڭ، ءبىلىمىڭ، شەشەندىك ونەرىڭ، زيالىلىعىڭ ەرەكشە ەدى. جەلتوقساندا بارامىز دەپ بەرلينگە بيلەت العانىم جوسپارلى ساپار بولعان جوق،قازان ايىندا وزىمنەن ءوزىم بالانى ساعان اپارعىم كەلدى. سوڭعى كەزدەسۋ بولارىن كىم بىلگەن، ۆولوديا! اناڭ ەمما الەكساندروۆنا، مەنىڭ اياۋلى ەنەمنىڭ قاسىنا كەتتىڭ… بالاڭ ءوزىڭدى كورىپ، بيىلعى تۋعان كۇنىڭمەن ءبىرىنشى بولىپ قۇتتىقتاعانى سوڭعى رەت ەكەن عوي… مىنا دۇنيەدەن تىنىشتىق تاپپاعان، تۇسىنىستىك تاپپاعان جانىڭ ءجانناتتان راحات تاپسىن!", - دەپ جازدى دانا نۇرجىگىت.
جۋرناليست ۆلاديمير رەريح پەن دانا نۇرجىگىت 1996 جىلى 11 ناۋرىزدا تانىسىپ، 15 جىل وتاسقان.
بەلگىلى تەلەجۇرگىزۋشى رەريح 1958 جىلى تالدىقورعاندا دۇنيەگە كەلگەن. 1987-1994 جىلدارى "سوۆەتسكي كازاحستان" كينوجۋرنالىندا رەجيسسەردىڭ كومەكشىسى، رەداكتور، "قازاقفيلم" كينوستۋدياسىندا رەجيسسەر، ستسەناريست جانە كوركەمدىك جەتەكشى قىزمەتىندە بولدى.
1996 جىلدان 2003 جىلعا دەيىن "حابار" اگەنتتىگىندە باسشىلىق لاۋازىمداردا ەڭبەك ەتتى. 2006 جىلدان 2011 جىلعا دەيىن - ەۋرازيالىق مەديافورۋمنىڭ باس پروديۋسەرى. "حابار" تەلەارناسىندا "پوزدني رەريح" تەلەباعدارلاماسىنىڭ اۆتورى جانە جۇرگىزۋشىسى بولدى.
