Qazaqstandyq telejúrgizýshi, medıamenedjer Vladımır Rerıh qaıtys boldy, dep habarlaıdy "Adyrna" tilshisi.
Medıamenedjer 67 jasynda qaıtys boldy. Bul týraly onyń burynǵy áıeli, áriptesi Dana Nurjigit Instagram-da habarlady.
"Álimniń ákesimen sońǵy kezdesýi eken… Volodıa, Vladımır, Vladımır Ahmadıanovıch Rerıh búgin Berlınde dúnıeden ozdy…
Uldy boldyq. Túsinispegen jerden men Qazaqstanda qalyp, sen Germanııaǵa kettiń. Biraq, sen meniń tulǵa bolyp qalyptasýyma, maman bolyp ósýime, ana bolyp bala tárbıesinde nege mán berý kerektigime zor yqpal ettiń, aqylshym, sapalylyq, danalyq, ar, kásibıliktiń bıik ólshemi boldyń. Parasatyń, bilimiń, sheshendik óneriń, zııalylyǵyń erekshe edi. Jeltoqsanda baramyz dep Berlınge bılet alǵanym josparly sapar bolǵan joq,qazan aıynda ózimnen ózim balany saǵan aparǵym keldi. Sońǵy kezdesý bolaryn kim bilgen, Volodıa! Anań Emma Aleksandrovna, meniń aıaýly enemniń qasyna kettiń… Balań ózińdi kórip, bıylǵy týǵan kúnińmen birinshi bolyp quttyqtaǵany sońǵy ret eken ǵoı… Myna dúnıeden tynyshtyq tappaǵan, túsinistik tappaǵan janyń jánnáttan rahat tapsyn!", - dep jazdy Dana Nurjigit.
Jýrnalıst Vladımır Rerıh pen Dana Nurjigit 1996 jyly 11 naýryzda tanysyp, 15 jyl otasqan.
Belgili telejúrgizýshi Rerıh 1958 jyly Taldyqorǵanda dúnıege kelgen. 1987-1994 jyldary "Sovetskıı Kazahstan" kınojýrnalynda rejısserdiń kómekshisi, redaktor, "Qazaqfılm" kınostýdııasynda rejısser, senarıst jáne kórkemdik jetekshi qyzmetinde boldy.
1996 jyldan 2003 jylǵa deıin "Habar" agenttiginde basshylyq laýazymdarda eńbek etti. 2006 jyldan 2011 jylǵa deıin - Eýrazııalyq medıaforýmnyń bas prodıýseri. "Habar" telearnasynda "Pozdnıı Rerıh" telebaǵdarlamasynyń avtory jáne júrgizýshisi boldy.
