بەلگىلى جۋرناليست، قازاقستان جۋرناليستەر وداعى سىيلىعىنىڭ لاۋرەاتى، اقپارات سالاسىنىڭ ۇزدىگى، مادەنيەت قايراتكەرى نۇرپەرزەنت دومباي ومىردەن وزدى. قارالى حاباردى اقپارات جانە قوعامدىق دامۋ ءمينيسترى ايدا بالاەۆا جەتكىزدى.
«نۇرپەرزەنت دومبايدىڭ ومىردەن وزۋىنا بايلانىستى مارقۇمنىڭ وتباسى مەن جاقىن-تۋعاندارىنىڭ قايعىلارىنا ورتاقتاسىپ كوڭىل ايتامىن.
نۇرپەرزەنت دومباي بۇكىل سانالى عۇمىرىن وتاندىق جۋرناليستيكا سالاسىنا ارناپ، قارىمدى قابىلەتىمەن، زور شىعارماشىلىق الەۋەتىمەن ۇلتتىق مەديانىڭ دامۋىنا ولشەۋسىز ۇلەس قوستى. قىزمەت جولىن وڭىرلىك باق-نان باستاپ، ءوزىنىڭ ەڭبەكقورلىعىمەن رەسپۋبليكالىق دەڭگەيگە دەيىن كوتەرىلدى. جۋرناليستيكامەن قاتار، پوەزيا الەمىنە دە قالام تەربەدى، ءماندى دە مازمۇندى دەرەكتى شىعارمالار جازدى. مارقۇمنىڭ جارقىن بولمىسى مەن تۇلعاسى جاقىندارى مەن ارىپتەستەرىنىڭ، جازعان رۋحاني دۇنيەلەرى قالىڭ وقىرمان قاۋىمنىڭ ەسىندە ماڭگi ساقتالادى. جاتقان جەرى جارىق، توپىراعى تورقا بولىپ، نۇرى پەيىشتە شالقىسىن»،–دەپ جازدى مينيستر.
«ادىرنا» ۇجىمى مارقۇمنىڭ جاقىندارى مەن تۋىستارىنا كوڭىل ايتادى.
«ادىرنا» ۇلتتىق پورتالى
