پارلامەنت پرەزيدەنتتىڭ بۇۇ ميسسيالارىنا قاتىسۋ ءۇشىن بىتىمگەرشىلىك كۇشتەرىن جىبەرۋ تۋرالى ۇسىنىسىن قولدادى، دەپ حابارلايدى «ادىرنا» ءتىلشىسى.
بۇۇ شاقىرۋى بويىنشا ءوزىنىڭ اسكەري تەحنيكاسىمەن، قارۋ-جاراعىمەن جانە مۇلكىمەن رەزەرۆ روتاسى رەتىندە 139 اسكەري قىزمەتشى سانىنداعى العاشقى دەربەس ۇلتتىق بىتىمگەرشىلىك كونتينگەنتىن «بۇۇ-نىڭ گولان بيىكتىكتەرىندەگى ءبولىنۋدى باقىلاۋ جونىندەگى كۇشتەرى» ميسسياسىنا ورنالاستىرۋ 2024 جىلعى ناۋرىزدان باستاپ جوسپارلانىپ وتىر.
«قازاقستانعا دەربەس بىتىمگەرلىك ميسسياسىنىڭ بەرىلۋى ءبىزدىڭ ەلدىڭ الەمدىك ارەناداعى بەدەلىن كورسەتەدى. بۇل قارۋلى كۇشتەردىڭ اتقارىپ جاتقان قىزمەتىن دە ايقىندايدى. العاش رەت گولان بيىكتىگىندە جۇزەگە اسىراتىن دەربەس بىتىمگەرلىك ميسسيا بولماق. روتانىڭ قۇرامىنا 139 اسكەري قىزمەتشى كىرەدى. اسكەرگە شاقىرىلعان ساربازدار ونىڭ قاتارىندا جوق. تەك قانا كاسىبي اسكەريلەر مەن كەلىسىمشارتتاعى وفيتسەرلەر، ولاردىڭ بارلىعى تولىق وقىتۋدان وتكەن»،— دەدى قورعانىس ءمينيسترى رۋسلان جاقسىلىقوۆ.
