1 ناۋرىزدا ساعات 00:00-دەن باستاپ ەلدىڭ بۇكىل اۋماعىندا بىرىڭعاي ۋاقىت بەلدەۋى ورناتىلادى. بۇل تۋرالى ساۋدا جانە ينتەگراتسيا مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
وسىلايشا قازاقستاندا 5-ءشى ۋاقىت بەلدەۋى (UTC+5) قولدانىلماق.
«قازاقستان رەسپۋبليكاسىنىڭ اۋماعىنداعى ۋاقىتتى ەسەپتەۋ ءتارتىبى تۋرالى» قازاقستان رەسپۋبليكاسى ۇكىمەتىنىڭ 2000 جىلعى 23 قاراشاداعى N 1749 قاۋلىسىنا ەنگىزىلگەن وزگەرتۋلەرگە سايكەس، «استانا، الماتى قالالارىنىڭ اكىمدىكتەرى، شىمكەنت، اقمولا، الماتى، جامبىل، قاراعاندى، قوستاناي، پاۆلودار، سولتۇستىك قازاقستان، تۇركىستان، شىعىس قازاقستان وبلىستارىندا جانە اباي، جەتىسۋ، ۇلىتاۋ وبلىستارىندا 2024 جىلعى 29 اقپاننان 1 ناۋرىزعا قاراعان ءتۇنى (ساعات 00:00-دە) جەرگىلىكتى ۋاقىتتى 1 ساعاتقا ارتقا قويۋ كەرەك»،—دەلىنگەن حابارلامادا.
ايتا كەتەيىك، بۇگىنگى تاڭدا قازاقستاندا UTC+5 جانە UTC+6 ەكى ۋاقىت بەلدەۋى بار. ەل اۋماعىنىڭ كوپ بولىگى (باتىس وبلىستاردى قوسپاعاندا) UTC+6 ايماعىندا ورنالاسقان.
ەلىمىزدە بىرىڭعاي ۋاقىت بەلدەۋىن ورناتۋدى ۋاقىتتى ەسەپتەۋ ماسەلەلەرى جونىندەگى جۇمىس توبىنا كىرگەن قازاقستاندىق عالىمدار مەن ساراپشىلار ۇسىنعان.
جۇمىس توبى 2023 جىلدىڭ اقپانىندا قازاقستاندىقتاردىڭ ەڭ قولايلى ۋاقىت بەلدەۋىنە كوشۋ تۋرالى بىرنەشە مارتە كەلىپ تۇسكەن وتىنىشتەرىنە بايلانىستى قۇرىلعان. ونىڭ قۇرامىنا عىلىمي ينستيتۋتتاردىڭ، مەديتسينالىق جوعارى وقۋ ورىندارىنىڭ، ورتالىق جانە جەرگىلىكتى مەملەكەتتىك ورگانداردىڭ وكىلدەرى، پارلامەنت دەپۋتاتتارى كىردى.
وتكەن جىلدان باستاپ مەديتسينا، فيزيولوگيا، گەوگرافيا،مەترولوگيا جانە باسقا دا ءتۇرلى سالالاردى قامتيتىن جۇمىس توبىنىڭ مۇشەلەرى قازاقستاندا قولايلى ۋاقىت بەلدەۋىن بەلگىلەۋ ماسەلەسىن زەرتتەپ كەلەدى. جۇمىس توبىنا قاتىسۋشىلار UTC+5 بىرىڭعاي ۋاقىت بەلدەۋىنە كوشۋ ەڭ دۇرىس جانە وڭتايلى نۇسقاسى ەكەنىن جانە قازاقستاننىڭ كوپتەگەن ايماقتارى تابيعي ۋاقىتقا ەڭ جاقىن ۋاقىتتى پايدالاناتىن بولادى دەگەن ورتاق پىكىرگە كەلدى.
