بيىل قىزدارعا ادام پاپيللوما ۆيرۋسىنا (اپۆ) قارسى ەكپە سالۋ ءۇشىن 9 ملرد تەڭگەگە ۆاكتسينا ساتىپ الىنادى. بۇل تۋرالى دەنساۋلىق ساقتاۋ ۆيتسە-ءمينيسترى – باس سانيتار دارىگەر ايجان ەسماعامبەتوۆا ايتتى، دەپ حابارلادى “ادىرنا” ۇلتتىق پورتالى.
ۆيتسە-ءمينيستردىڭ ايتۋىنشا، الەمدە ادام پاپيللوما ۆيرۋسىنا قارسى ۆاكتسينانى شىعاراتىن 4 ءوندىرۋشى كاسىپورىن بار.
«مۇندا 2 ءوندىرۋشى 2 ۆالەنتتى ۆاكتسينانى وندىرەدى. بۇل ادام پاپيللوما ۆيرۋسىنىڭ 2 تۇرىنەن قورعايدى. ەكپەنى وندىرەتىن ەلدىڭ ءبىرى – اقش. ولار ۆاكتسينانىڭ 2 ءتۇرىن شىعارادى: 4 ۆالەنتتى جانە 9 ۆالەنتتى. سوندىقتان بۇگىن ءبىز قانداي ۆاكتسينا ساتىپ الاتىنىمىزدى انىقتايمىز. ول 4 ۆالەنتتى جانە 9 ۆالەنتتى بولۋى مۇمكىن. جالپى 9 ۆالەنتتى ەكپە وتە تاپشى جانە ونى ساتىپ الۋ وتە قيىن»، - دەدى ايجان ەسماعامبەتوۆا سەنات كۋلۋارىندا.
ودان بولەك، بيىل بالالاردى ۆيرۋستان قورعاۋ ءۇشىن بيۋدجەتتەن قوماقتى قارجى قاراستىرىلعان.
«2024 جىلعا ادام پاپيللوما ۆيرۋسىنا قارسى ۆاكتسينا ساتىپ الۋ ءۇشىن شامامەن 9 ملرد تەڭگە قاراستىرىلعان. 175 مىڭ (تەك 11 جاستاعى، – اۆتور) قىزعا 2 ۆاكتسينا سالىنادى. دەمەك ءبىز ەكپەنىڭ 350 مىڭ دوزاسىن ساتىپ الامىز. الايدا بۇل ۆاكتسينا تەك وسى باعاعا (9 ملرد تەڭگەگە) ساتىپ الىنادى دەپ ايتۋعا بولمايدى. سەبەبى ۆاكتسينانىڭ باعاسى ءبىزدىڭ ەرەجەمىزگە سايكەس انىقتالادى. بۇل باعاعا تەندەر جاريالانادى. سۇرانىسقا بايلانىستى باعا نە تومەندەۋى نە كەرىسىنشە (كوتەرىلۋى) مۇمكىن»، - دەدى ۆيتسە-مينيستر.
ايتا كەتەيىك، اپۆ – الەمدەگى ەڭ كوپ تارالعان ۆيرۋس. ونىڭ كوپتەگەن ءتۇرى بار. بۇگىندە زەرتتەلگەن شتامدارىنىڭ ءوزى 200-دەن اسادى. ەڭ قاۋىپتى ءتۇرى – 16 جانە 18-تيپتەگى ۆيرۋس. مۇنداي ونكوگەندى ۆيرۋستار جاتىر موينى مەن ۆۋلۆادا، ەر ادامنىڭ جىنىس مۇشەسى مەن شىرىشتى قاباتى بار باسقا دا ورگاندارىندا وبىر اۋرۋىن تۋعىزادى.
اپۆ-دان قورعانۋدىڭ جالعىز جولى – ۆاكتسينا سالعىزۋ. ول عىلىمي تۇرعىدا دالەلدەنگەن.
