ءماجىلىس دەپۋتاتى ماقسات تولىقباي كەزەكتى وتىرىستا جەر ماسەلەسىن كوتەردى، دەپ حابارلايدى "ادىرنا" ۇلتتىق پورتالى. دەپۋتاتتىق ساۋال قازاقستان رەسپۋبليكاسىنىڭ پرەمەر-ءمينيسترىنىڭ ورىنباسارى سەرىك جۇمانعارينعا جانە قازاقستان رەسپۋبليكاسىنىڭ باس پروكۋرور بەرىك اسىلوۆقا جولداندى.
بۇل جولى جەر داۋى ۇشقوڭىر تاۋىنا قاتىستى بولدى.
"ۇشقوڭىر دەگەن تاۋدىڭ بارىن ءبارىڭىز بىلەسىزدەر. تالايلاردىڭ كىندىك قانى تامىپ، تىرلىگىنە ارقاۋ بولعان سول تاۋ بۇگىندە ساي-سالا، قىرات-جوتالارىمەن تۇگەل ءبىر ازاماتتاردىڭ عانا مەنشىگىندە. الماتى وبلىسىنداعى ۇشقوڭىر ۇستىرتىنە بارار جولدى باسىنان-اياعىنا دەيىن مۇزداي قارۋالانعان توپ كۇزەتەدى. جول جوق ەمەس بار. بىراق جابىق. كوزىممەن كورىپ، سول تاۋدىڭ ەتەگىندەگى ەلمەن تىلدەسكەن سوڭ، دەپۋتاتتىق ساۋالعا ارقاۋ بولىپ وتىر" دەپ باستادى ءسوزىن ماقسات تولىقباي.
ول ۇشقوڭىر "ىلە الاتاۋى پاركىنە قارايتىندىقتان", ول اۋماقتى ۇلتتىق پاركتىڭ كۇزەتشىلەرى كۇزەتۋ كەرەكتىگىن جانە تاۋدى اينالدىرا قورشاپ تاستاۋ - بارىپ تۇرعان باسسىزدىق دەپ اتادى ول.
ء"بىز AMANAT پارتياسى جايىلىم تاپشىلىعىن شەشۋ ءۇشىن ارنايى «جەر اماناتى» كوميسسياسىنىڭ تىكەلەي ارالاسۋىمەن رەسپۋبليكا بويىنشا 9 ميلليون گەكتاردان استام جەر قايتارساق، ال ونىڭ وسى ايماقتان 1400 گەكتارى ەل يگىلىنە بەرىلدى. سويتسەك، ونىمىز بەكەر ەكەن، «اماناتتىق» اعايىن! جۇرتقا قاجەت جايىلىم جەردىڭ ءبارى جاڭاعى قورشاۋدا قالىپ قويعان. وسىلايشا جۇرتتىڭ ءوز جەرىنە كىرمەك تۇگىلى جاڭاعى قارۋلى بەكەتتەن وتۋگە ءداتى جەتپەي ءجۇر. انىعى، «دۇنيەاگرو» جشس-نە 2004 جىلى «ۇشقوڭىر» ۇستىرتىندە ورنالاسقان جۇزدەگەن گەكتار جەرگە مەنشىك قۇقىعى زاڭسىز بەرىلگەن. ويتكەنى، زاڭ تالاپتارى بويىنشا، (23-باپ، 50-باپ، 8 جانە 43-باپ) ارنايى ماقساتتاعى جەرلەردى زاڭدى تۇلعالاردىڭ جەكەشەلەپ الۋىنا قۇقىعى جوق. ءتىپتى ونى بولۋگە دە كەلمەيدى. بۇل نورمالاردى جەرگىلىكتى پروكۋراتۋرا جاقسى بىلەدى. بىراق، جەردىڭ زاڭسىز بەرىلۋ فاكتىسى بويىنشا پروكۋراتۋرانىڭ تالاپتارىن سوت قاناعاتتاندىرماي تاستاعان. سوراقىسى دا سول بولىپ تۇر. «سوندا قازاقستان رەسپۋبليكاسىنىڭ زاڭىنا شەكەسىنەن قارايتىن بۇل نە قىلعان شەكتەن شىعۋ؟»، – دەگەن حالىقتىڭ بازىناسىنا قالاي جاۋاپ بەرەمىز؟!" دەدى ول.
ءسوز سوڭىن ول ۇشقوڭىر تاۋىن باسقا ماقساتتا پايدالانىپ وتىرعان كومپانيالاردان الىپ، مەملەكەتكە قايتارۋ قاجەتتىگىن ايتتى:
"بۇدان باسقا، “ۇشقوڭىر” ۇستىرتىندە «Steppe AgroMeat»، «Breeding Company» سياقتى ەكى-ءۇش كومپانيا 13 597 گا جەردى ءالى كۇنگە دەيىن ماقساتسىز پايدالانىپ وتىرعانى انىقتالدى. شۇعىل قايتارۋ كەرەك! الايدا، الپاۋىتتارمەن الىسۋعا اكىمدىك پەن اۋدان پروكۋرورلارىنىڭ پارمەنى جەتپەي، تاعى دا دارمەنى قۇري ما دەگەن كۇدىك تە جوق ەمەس. سوندىقتان، الماتى وبلىسىنىڭ قاراساي اۋدانىندا بولىپ جاتقان زاڭسىزدىقتارعا باس پروكۋراتۋرا مەن ۇكىمەت شۇعىل نازار اۋدارىپ، ارنايى كوميسسيا قۇرىپ، جوعارىدا مەن كەلتىرگەن ماسەلەلەرگە ءتيىستى قۇقىقتىق باعا بەرۋى ءتيىس دەپ ەسەپتەيمىن" دەدى ول.
بۇعان دەيىن، الاتاۋ باۋرايىنداعى ۇشقوڭىر جايلاۋى ءالى جابىق ەكەنى ايتىلعان بولاتىن. ءماجىلىس دەپۋتاتى ماقسات تولىقباي قورشالعان جەرگە كىرە الماي قايتقان ەدى.
