ەندى وڭتۇستىكتەن سولتۇستىككە كوشكەن قازاقستاندىقتار مەن قانداستارعا ءوز كاسىبىن جۇرگىزۋگە كەزەكسىز 20 گەكتار جەر بەرىلەدى. بۇل تۋرالى كوشى-قون كوميتەتى توراعاسىنىڭ مىندەتىن اتقارۋشى ءىلياس يسپانوۆ ايتتى، دەپ حابارلايدى “ادىرنا” ۇلتتىق پورتالى.
ءىلياس يسپانلۆتىڭ ايتۋىنشا، بيىل وڭتۇستىكتەن سولتۇستىككە 7 550 ادام كوشكەن. ونىڭ 1 200-ءى – قانداس، تەك 76 ادام وڭتۇستىككە قايتقان.
“سولتۇستىكتەن كوشىپ كەتكەن 33 ادامعا سول جاقتىڭ كليماتى، ال 30 ادامعا سولتۇستىكتەن تاپقان جۇمىسى ۇناماعان. ەندى بيىل سولتۇستىككە كوشىپ بارعان ازاماتتارعا ءوز شارۋاشىلىعىن جۇرگىزۋگە كەزەكسىز 20 گەكتارعا دەيىن جەر بەرۋ ماسەلەسى زاڭ جوباسىندا تۇر”، - دەدى ءىلياس يسپانوۆ وكق-دا وتكەن بريفينگتە.
سونىمەن قاتار، ول بۇرىن سولتۇستىككە كوشىپ بارعان قازاقستاندىقتار مەن قانداستارعا 40 سوتىق جانە 1 گەكتار جەر بەرىلىپ كەلگەنىن ايتا كەتتى.
“ەندى شارۋا قوجالىعىن جۇرگىزۋگە 20 گەكتار جەر بەرىلەدى. ءبىرىنشى 5 جىلدا جەر جالعا بەرىلەدى. ەگەر 5 جىلدا ول ءوزى ويلاعان مەجەگە جەتىپ، كاسىبىن دامىتسا، وندا جەر 49 جىلعا جالعا بەرىلەدى”، - دەدى باسشى.
بۇگىندە زاڭ جوباسى دەپۋتاتتاردىڭ قاراۋىندا جاتىر.
«وزگەرىس كۇشىنە ەنگەن جوق. ءبىز ۇسىنىستى ەنگىزدىك. قازىر زاڭ جوباسى دەپۋتاتتاردىڭ قاراۋىندا جاتىر. زاڭ جاڭا جىلدان كەيىن كۇشىنە ەنۋى كەرەك. كوكتەمگى ەگىس جۇمىستارى باستالعانعا دەيىن وزگەرىستى كۇشىنە ەنگىزۋگە تىرىسامىز»، - دەدى كوشى-قون كوميتەتى توراعاسىنىڭ مىندەتىن اتقارۋشى.
