مۇنداي قوماقتى قارجىنى تابا الماعان قارشاداي 15 جاسار قىزدى بىرنەشە رەت پىشاقتاپ، دەنەسىن سۋعا اعىزىپ جىبەرگەنىن تۋىستارى ايتىپ، زار ەڭىرەپ وتىر.
قازىر كۇدىكتىلەر قاماۋعا الىنىپ، تەرگەۋ ءىسى ءجۇرىپ جاتىر. الايدا مارقۇم تۋىستارىنىڭ كوڭىلى كۇپتى. ولار كۇدىكتىلەر ايىپتان سىتىلىپ، جازادان قۇتىلىپ كەتە مە دەپ قورقادى. ويتكەنى ۇستالعانداردىڭ ءبىرى بۇرىنعى اكىمنىڭ ۇلى، ال ەكىنشى كۇدىكتى داۋلەتى تاسقان اۋقاتتى وتباسىنان شىققان.
كتك تەلەارناسى ارۋجاننىڭ ۇيىنەن سوڭعى مارتە سىرتقا شىققان ءساتىنىڭ بەينەكامەراعا ءتۇسىپ قالعانىن حابارلادى. ارۋجاننىڭ "اقىرعى بەينەسىن" كورشى ءۇيدىڭ قوراسىنا قويىلعان قۇرىلعى جازىپ العان. دەرەكتەرگە قاراساق، تۇنگى ون ەكىلەر شاماسىندا الدەكىممەن تەلەفون ارقىلى تىلدەسكەن قىز ارىق بويىن جاعالاي جۇرەدى. ەرتەسىنە دەنەسى بىرەر شاقىرىم ۇزاقتاعى ارىقتىڭ ىشىنەن تابىلادى.
اجەسى نەمەرەسىنىڭ كىسى قولىنان ولگەنىنە سەنىمدى. ويتكەنى ءۇيدىڭ ىرگەسىندەگى ارىقتىڭ ماڭى ابدەن قان-جوسا بولعان. كۇدىكتىلەر ءىزىن سۋىتۋ ماقساتىندا ارۋجاندى وزىنە قول سالعانداي كورسەتىپ، جاراقاتتاعان، كەيىن ارىقتىڭ ىشىنە تاستاعان دەيدى.
"دىبىسى شىقپاسىن دەپ جاڭاعى 11-سىنىپتىڭ بالاسى قولىن ارتقا ۇستاپ تۇرعان. قايىرىپ، اناۋ پىشاقتى ەكى رەت ۇرعان. ودان كەيىن قىز قۇلاعان. كەيىن اناۋ 11-cىنىپتاعى بالاعا: "قانە، سەن قولىن كەس" دەگەن. ودان كەيىن ول قولىن كەسكەن. ارىقتىڭ جاعاسىنداعى قان دەگەنىڭ كول كوسىر", - دەدى مارقۇمنىڭ اجەسى قۇرمانكۇل سالقىنبەكوۆا.
قارا جامىلعان وتباسى قىزدىڭ جالاڭاش فوتوسىن جالپىعا جاريالاماس ءۇشىن كۇدىكتىلەردىڭ ارۋجاننان 1 ميلليون تەڭگە تالاپ ەتكەنىن ايتادى.
"سوڭعى مارتە، التىسىندا قىزىم مەنەن اقشا سۇرادى. سوسىن "اكەڭنەن سۇراشى" دەگەن ەدىم، "ماما، سىزدەر ونداي اقشانى تاۋىپ بەرە المايسىزدار" دەدى. مەنىڭ قىزىمنىڭ كۇلىپ وينايتىن ادەتى بار ەدى... سودان سوڭ، "نەعىلاسىڭ ول اقشانى؟" دەپ قايتا-قايتا سۇراپ ەدىم، "ماما، مەن شەتەلگە كەتەم" دەدى. مىنە، شەتەلگە كەتتى عوي. وسى ەكى بالا بوپسالاعان. “اقشا بەرمەسەڭ، ماسقاراڭدى شىعارام، سەنىڭ سۋرەتىڭدى شىعارام” دەگەن", - دەدى مارقۇمنىڭ اناسى دينارا زىلعاراەۆا.
"ادىرنا" ۇلتتىق پورتالى
