پاۆلوداردىڭ بۇرىنعى اكىمى ەرجان يمانزايىپوۆ پاۆلودار وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنا باسشى بولدى. بۇل تۋرالى پاۆلودار وبلىسى اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنششا، بۇرىنعى اكىمدى جاڭا قىزمەتكە تاعايىنداۋ تۋرالى وكىمگە ءوڭىر باسشىسى قول قويعان.
ەسكە سالا كەتەيىك، 2023 جىلدىڭ قىركۇيەگىندە وبلىس اكىمىنىڭ وكىمىمەن ەرجان يمانزايىپوۆ قاراماعىنداعى قىزمەتكەرلەرگە قاتىستى جەمقورلىق داۋى بولىپ، پاۆلودار قالاسى اكىمى قىزمەتىنەن كەتكەن ەدى.
ەرجان يمانزايىپوۆتى قىزمەتتەن الىپ تاستاماس بۇرىن ءوڭىر اكىمى اسايىن بايحانوۆ پاۆلودار اكتيۆىمەن كەزدەسۋدە قاراماعىنداعىلار اراسىندا سىبايلاس جەمقورلىقتىڭ الدىن الۋ بويىنشا جۇمىستى تيىسىنشە ۇيىمداستىرماۋ، قالا تۇرعىندارى ءۇشىن وبلىس ورتالىعىن دامىتۋ جانە اباتتاندىرۋ جونىندەگى ماڭىزدى جوبالاردىڭ ىسكە اسىرىلۋى تالاپ ەتىلەتىن باقىلاۋدىڭ بولماۋى، سونىمەن قاتار قالا اكىمدىگىنىڭ پاۆلودار حالقىمەن كوممۋنيكاتسياسىنىڭ السىرەۋى دەگەن سىن-پىكىرلەر قىزمەتتەن بوساتۋعا سەبەپ بولعانىن ايتادى.
2023 جىلدىڭ 1 قىركۇيەگىندە اسايىن بايحانوۆ ءماجىلىس وتىرىسىندا پاۆلودار اكىمىنىڭ جۇمىستان شىعارىلۋى ونىڭ كومەكشىسىنە قاتىستى تەرگەۋدىڭ باستالۋىنا بايلانىستى ما دەگەن سۇراققا جاۋاپ بەردى. سوندا ول ءوڭىردىڭ سىبايلاس جەمقورلىققا قارسى قىزمەتىنىڭ اقپاراتىنا سايكەس، ەشكىمنىڭ قاماۋعا الىنباعانىن حابارلادى.
ەرجان يمانزايىپوۆ ءار جىلدارى پاۆلوداردىڭ تۇرعىن ءۇي-كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى بولىمىندە، يندۋستريا جانە ساۋدا مينيسترلىگىنىڭ قۇرىلىس جانە تكش ىستەرى كوميتەتىندە، تابيعي مونوپوليالاردى رەتتەۋ اگەنتتىگىندە جۇمىس ىستەگەن.
ودان بولەك، اقمولا وبلىسىنىڭ تابيعي مونوپوليالاردى رەتتەۋ دەپارتامەنتى ديرەكتورىنىڭ ورىنباسارى، تابيعي مونوپوليالاردى رەتتەۋ اگەنتتىگى دەپارتامەنتى ديرەكتورىنىڭ ورىنباسارى قىزمەتتەرىن اتقاردى.
- 2014 جىلدان 2017 جىلعا دەيىن پاۆلودار اكىمىنىڭ ورىنباسارى، ەكىباستۇز اكىمىنىڭ ورىنباسارى لاۋازىمىن اتقاردى.
- 2017 جىلدان 2019 جىلعا دەيىن پاۆلودار وبلىسىنىڭ ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى بولىپ جۇمىس ىستەدى.
- 2019 جىلدان 2020 جىلعا دەيىن ەكىباستۇز قالاسىنىڭ، كەيىن پاۆلودار قالاسىنىڭ اكىمى بولدى.
- 2023 جىلدىڭ 12 قىركۇيەگىندە پاۆلودار قالاسىنىڭ اكىمى حاسار حابىلبەكوۆ بولدى. وسى تاعايىنداۋعا دەيىن ول پاۆلودار وبلىسى اكىمىنىڭ ءبىرىنشى ورىنباسارى قىزمەتىن اتقارعان.
