Pavlodardyŋ būrynǧy äkımı Erjan İmanzaiypov Pavlodar oblysynyŋ energetika jäne tūrǧyn üi-kommunaldyq şaruaşylyq basqarmasyna basşy boldy. Būl turaly Pavlodar oblysy äkımınıŋ baspasöz qyzmetı mälımdedı, dep habarlaidy “Adyrna” ūlttyq portaly.
Mälımet boiynşa, būrynǧy äkımdı jaŋa qyzmetke taǧaiyndau turaly ökımge öŋır basşysy qol qoiǧan.
Eske sala keteiık, 2023 jyldyŋ qyrküiegınde oblys äkımınıŋ ökımımen Erjan İmanzaiypov qaramaǧyndaǧy qyzmetkerlerge qatysty jemqorlyq dauy bolyp, Pavlodar qalasy äkımı qyzmetınen ketken edı.
Erjan İmanzaiypovty qyzmetten alyp tastamas būryn öŋır äkımı Asaiyn Baihanov Pavlodar aktivımen kezdesude qaramaǧyndaǧylar arasynda sybailas jemqorlyqtyŋ aldyn alu boiynşa jūmysty tiısınşe ūiymdastyrmau, qala tūrǧyndary üşın oblys ortalyǧyn damytu jäne abattandyru jönındegı maŋyzdy jobalardyŋ ıske asyryluy talap etıletın baqylaudyŋ bolmauy, sonymen qatar qala äkımdıgınıŋ Pavlodar halqymen kommunikasiiasynyŋ älsıreuı degen syn-pıkırler qyzmetten bosatuǧa sebep bolǧanyn aitady.
2023 jyldyŋ 1 qyrküiegınde Asaiyn Baihanov mäjılıs otyrysynda Pavlodar äkımınıŋ jūmystan şyǧaryluy onyŋ kömekşısıne qatysty tergeudıŋ bastaluyna bailanysty ma degen sūraqqa jauap berdı. Sonda ol öŋırdıŋ sybailas jemqorlyqqa qarsy qyzmetınıŋ aqparatyna säikes, eşkımnıŋ qamauǧa alynbaǧanyn habarlady.
Erjan İmanzaiypov är jyldary Pavlodardyŋ tūrǧyn üi-kommunaldyq şaruaşylyq, jolauşylar kölıgı jäne avtomobil joldary bölımınde, İndustriia jäne sauda ministrlıgınıŋ qūrylys jäne TKŞ ısterı komitetınde, tabiǧi monopoliialardy retteu agenttıgınde jūmys ıstegen.
Odan bölek, Aqmola oblysynyŋ tabiǧi monopoliialardy retteu departamentı direktorynyŋ orynbasary, tabiǧi monopoliialardy retteu agenttıgı departamentı direktorynyŋ orynbasary qyzmetterın atqardy.
- 2014 jyldan 2017 jylǧa deiın Pavlodar äkımınıŋ orynbasary, Ekıbastūz äkımınıŋ orynbasary lauazymyn atqardy.
- 2017 jyldan 2019 jylǧa deiın Pavlodar oblysynyŋ energetika jäne tūrǧyn üi-kommunaldyq şaruaşylyq basqarmasynyŋ basşysy bolyp jūmys ıstedı.
- 2019 jyldan 2020 jylǧa deiın Ekıbastūz qalasynyŋ, keiın Pavlodar qalasynyŋ äkımı boldy.
- 2023 jyldyŋ 12 qyrküiegınde Pavlodar qalasynyŋ äkımı Hasar Habylbekov boldy. Osy taǧaiyndauǧa deiın ol Pavlodar oblysy äkımınıŋ bırınşı orynbasary qyzmetın atqarǧan.
