الماتىدا «مەدەۋ» سپورت كەشەنى ماڭىندا تۇرعىندارعا قاۋىپتى جاعدايدا ۇشقان «قازاۆياقۇتقارۋ» اق-نىڭ تىكۇشاعىعىنا قاتىستى تەرگەۋ جۇرگىزىلمەك، دەپ حابارلايدى "ادىرنا" ۇلتتىق پورتالى قازتاگ-قا سىلتەمە جاساپ.
رەسمي اقپاراتقا سايكەس، ۇشۋ الدىن الا بەرىلگەن ءوتىنىم بويىنشا جوسپارلانعان. ۇشقىش — تاجىريبەلى مامان، ال ۇشار الدىندا بورتمەحانيك ادامدارعا قاۋىپسىزدىك تۋرالى ەسكەرتۋ جاساعان.
دەگەنمەن، ۇشۋ ساتىندە جەلدىڭ باعىتى مەن كۇشى كۇرت وزگەرىپ، تىكۇشاقتىڭ تۇراقتىلىعىنا اسەر ەتكەن بولۋى مۇمكىن.
قازىر وقيعانىڭ سەبەپتەرى ىشكى تەكسەرىس اياسىندا انىقتالۋدا. ال تەحنيكالىق اقاۋ تىركەلمەگەن.
ازاماتتىق اۆياتسيا كوميتەتىنىڭ بۇرىنعى توراعا ورىنباسارى سەرىك مۇحتىباەۆ ەكيپاجدىڭ ارەكەتىندە ازاماتتىق اۆياتسيا ەرەجەلەرىنىڭ ورەسكەل بۇزىلۋى بارىن مالىمدەدى. ونىڭ پىكىرىنشە، مۇنداي جاعداي — بولاشاقتا قايعىلى اۆياتسيالىق وقيعاعا سەبەپ بولۋى مۇمكىن. ول تىكۇشاق ۇشاتىن اۋماق قورشالۋى، قاۋىپسىزدىككە جاۋاپتى ورگاندار تارتىلۋى ءتيىس بولعانىن اتاپ ءوتتى.
مۇحتىباەۆ بۇعان دەيىن دە وسىنداي ۇشۋلارعا قاتىستى سىن ايتقانىن ەسكە سالدى. 2023 جىلدىڭ قىسىندا كوكجايلاۋ ماڭىندا ۇشقىش تۋريستىك سوقپاقتا ادامدار جۇرگەنىنە قاراماستان قونۋ جانە ۇشۋ جاساعان. ول كەزدە دە قاۋىپسىزدىك شارالارى ەسكەرىلمەگەن بولاتىن.
ساراپشى بۇل جولعى جاعداي دا سول ەرەجەسىزدىكتىڭ جالعاسى ەكەنىن ايتىپ، جاۋاپتى ورگانداردى تەك ەكيپاجعا عانا ەمەس، ۇيىم باسشىلىعىنا دا شارا قولدانۋعا شاقىردى.
