الماتىداعى جالدامالى پاتەرلەردىڭ بىرىندە تۋعان اكەسى ەكى ۇلىن اياۋسىزدىقپەن ولتىرگەن. اجەسىنىڭ ايتۋىنشا، قاتىگەز اكە بالالارىن اۋرۋحاناعا اپارامىن دەپ الىپ كەتكەن، دەپ حابارلايدى "ادىرنا" ۇلتتىق پورتالى Massaget.kz-كە سىلتەمە جاساپ.
بەلگىلى بولعانداي، بالالاردىڭ ۇلكەنى 5-سىنىپتا، ال كىشىسى بيىل 2-سىنىپتا وقيدى ەكەن.
88 جاستاعى زەينەتكەر ۆالەنتينا وسينا كۇيەۋ بالاسى شوبەرەلەرىن "جاقسى كورمەگەنىن", ءتىپتى وزىنە قارسى قويعانىن جەتكىزدى.
"ول ەشقاشان مەنىڭ شوبەرەلەرىمدى جاقسى كورمەگەن. ءتىپتى تۋعان كۇنىمەن قۇتتىقتامايتىن. ونىڭ 7 باۋىرى، 2 اپكەسى بار. سولاردىڭ تەك بىرەۋى حابارلاستى، قالعاندارى باۋىرلارىنىڭ ارەكەتى دۇرىس دەپ سانايدى. ۇيلەردىڭ بارىنە كامەرا قويىپ، مەنى باقىلاپ ءجۇردى. "سەنىڭ ورنىڭ قوقىستا", - دەپ مەنى بالاعاتتاپ، ۇنەمى ۇيدەن قۋاتىن. بالالارعا: "اجەلەرىڭدى يتەرىڭدەر، قوقىس لاقتىرىڭدار", - دەپ ناشار تاربيە بەردى. 10 مارتە ۋچاسكەلىك پوليتسەيدى شاقىردىم. ولار ماعان باسقا جەرگە كوشۋىمدى ۇسىندى. الايدا مەن شوبەرەلەرىمدى قيمادىم. بالالاردى 4 جەلتوقسان كۇنى اۋرۋحاناعا الىپ كەتكەن بولاتىن. اقىرى وسىلاي اياقتالدى", - دەيدى مارقۇم بالالاردىڭ اجەسى ۆالەنتينا وسينا.
كىشى بالاسى مەنينگيتپەن اۋىرعاندىقتان، ەستۋ قابىلەتى ناشارلاعان. وقۋ ماۋسىمى باستالعاننان بەرى ۇيدەن ءبىلىم الىپتى. اكەسى بالانى ءوزى اپارىپ، ەمدەتىپ جۇرگەن. بۇل جولى دا بالالاردى "اۋرۋحاناعا اپارامىن" دەپ الىپ كەتكەن.
كۋاگەرلەردىڭ ايتۋىنشا، ول بالالاردى ولتىرگەننەن كەيىن بەينەجازباعا ءتۇسىرىپ، باۋىرلارىنىڭ بىرىنە جىبەرگەن. بالالارىن ولتىرگەن اكەنىڭ بۇل ارەكەتى ەسىرتكىگە ەلىتكەندىكتەن نەمەسە اششى سۋدىڭ بۋىمەن جاسادى دەگەن بولجامدار دا ايتىلدى. الايدا بۇل تەك بولجام عانا. ەر ادامنىڭ بالالاردى قانداي قارۋمەن، قالاي ولتىرگەنى دە بەلگىسىز. تەك مارقۇمداردىڭ بەتىنەن تىلىنگەن پىشاق ىزدەرى بايقالعان.
كەشە، 8 قاڭتاردا بالالاردىڭ دەنەسى جەر قوينىنا تاپسىرىلدى.
"ادىرنا" ۇلتتىق پورتالى
