Qazaqstanda qolma-qol tölem ǧana qabyldaityn käsıpkerlerge aiyppūl salynady. Būl turaly Memlekettık kırıster komitetı aitty, dep habarlaidy «Adyrna» tılşısı.
«Qolma-qol aqşasyz tölemderdı qabyldaudan bas tartu zaŋsyz bolyp tabylady jäne tūtynuşylardyŋ qūqyqtaryn būzady. Käsıpkerlerdıŋ tölem kartalaryn paidalana otyryp tölemderdı qabyldaudan bas tartqany üşın bırınşı ret äkımşılık jauapkerşılıkke tartylyp, eskertu jasalady, al qaitalap būzǧan jaǧdaida – 147 680 teŋge (40 AEK) kölemınde aiyppūl salynady»,—dep tüsındırdı basqarma.
Aitularynşa, mobildı audarymdardy tekseru zaŋsyz käsıpkerlık qyzmettı köleŋkeden şyǧaruǧa baǧyttalǧan.
«Keibır käsıpkerler satylǧan tauarlar nemese qyzmetter üşın tölemdı mobildı audarymdar arqyly alady. Alaida, būl audarymdar kassalyq apparattardy, POS-terminaldardy jäne QR-kodtardy qoldanbai jürgızıledı. Tiısınşe, chekter berılmeidı jäne tūtynuşylardyŋ qūqyqtary būzylady. Memleket barlyq mobildı audarmany teksermeidı. Tek ärtürlı tūlǧalardan üş ai qatarynan ai saiyn 100 nemese odan da köp mobildı audarymdar alǧan tūlǧalar ǧana, iaǧni, käsıpkerlık qyzmettıŋ belgılerı baiqalǧan jaǧdaida tekseru jürgızıledı»,—dep tolyqtyrdy komitet.
Būdan bölek basqarma käsıpker qolma-qol aqşasyz tölem qabyldaudan bas tartsa, qaida jügınuge bolatynyn aitty. «Qolma-qol aqşasyz tölemderdı qabyldaudan bas tartu faktılerı turaly tūrǧylyqty jerı boiynşa memlekettık kırıs organdaryna jügınu qajet»,—delıngen habarlamada.
