بۇگىن شقو تارباعاتاي اۋدانىندا ىرعىزباي دوسحاناۇلى اتىنداعى ورتالىق ستاديوندا مىڭداعان ادام جينالىپ، 30 مەملەكەتتەن كەلگەن 90 بالۋاننىڭ باق پەن كۇش سىناسۋىنا كۋا بولدى.
ايتا كەتسەك، تۋرنير جەتىنشى رەت وتكىزىلىپ وتىر. وسى ۋاقىت ارالىعىندا قاتىسۋشىلار مەن مەملەكەتتەر سانى ارتتى. ال بيىل «تۇعىرى بيىك تارباعاتاي» ونەر مەن سپورت فەستيۆالى اياسىندا ءوتۋى اۋقىمدىلىعىن كەڭەيتىپ وتىر.
حالىقارالىق دەڭگەيدەگى تورەشى، ونەر مەن سپورت فەستيۆالىن ۇيىمداستىرۋشى كوميتەتتىڭ توراعاسى تالعات مازىباەۆتىڭ ايتۋى بويىنشا، قازاق كۇرەسى قىركۇيەك ايىندا كورەيا ەلىندە وتەتىن الەمدىك ويىنداردىڭ تىزىمىنە ەندى. سوندىقتان تۋرنيرگە شەتەلدىك سپورتشىلاردىڭ قاتۋى جاقسى مۇمكىندىك.
- ءبىز جىل سايىن حالىقارالىق سپورتشىلاردى اشىق اسپان استىنداعى تۋرنيرگە شاقىرامىز. ەۋروپا ەلدەرىندە قازاق كۇرەسى تانىمالدىلىعىنىڭ ارتۋى قۋانتادى. الداعى ۋاقىتتا قازاق كۇرەسىن وليمپيادا ويىندارىنا قوسۋ ماقساتىمىز بار. ونىڭ بارلىعى ۋاقىت ەنشىسىندە. بيىل العاش رەت يتاليا، رۋمىنيا جانە نيدەرلانديا مەملەكەتتەرىنىڭ بالۋاندارى قاتىسۋدا،-دەدى باس تورەشى.
گرەكيالىق كوماندا وكىلى پەكوس تەودوراس ءوزى بالا كەزىندە اتالمىش سپورت تۇرىمەن اينالىسقانىن ايتتى. - ءبىز وسى تۋرنيرگە نەشە مارتە قاتىسىپ كەلەمىز. جىلدان جىلعا تريبۋنالار جانكۇيەرلەرگە تولىپ، شارانىڭ اۋقىمدىلىعىنىڭ ارتقاندىعىنىڭ كۋاسىمىز.
كۇنى بويى سپورتشىلار ۇلكەن دوداعا ءتۇستى. بارلىق 90 سپورتشى ءوز ەلدەرىنىڭ نامىسىن جوعارى شەبەرلىكپەن قورعاپ شىقتى.
ناتيجەسىندە 70 كەلى سالماقتا قولا جۇلدەگە مولدوۆيا سپورتشىسى گەوردجە روكۋ، كۇمىسكە قازاقستاندىق وسكەن تولەۋبەكوۆ، ال التىن جۇلدەگە گرۋزيالىق زۆياد ودوشەشۆيلي يە بولدى.
80 كەلى سالماقتا ءبىرىنشى ورىندى تادجىكستان سپورتشىسى حامروز رادجابو، ەكىنشى ورىندى گرۋزيالىق كاحا مومۋلاشۆيلي، ءۇشىنشى ورىندى قازاقستاندىق بەكزات ماناسباەۆ يەلەندى.
80-نەن جوعارى سالماقتا تارتىلىس قىزۋ بولدى. قازاقتاندىق ايبەك نۇعىماروۆ پەن وزبەكستاندىق مۋحسين حيسومۋدينوۆ ەكى مىقتى بالۋان. كورەرمەندەر ۇلكەن ءارى قىزۋ جەكپە-جەكتى تاماشالادى. ۇلكەن تارتىس ناتيجەسىندە حالىقارالىق گران-ءپريدى ايبەك نۇعىماروۆ جوعارى ابىرويمەن يەلەندى.
مۋحسين حيسومۋدينوۆ ەكىنشى ورىنعا، گرۋزيالىق گەوردجي كاتارادزە ءۇشىنشى ورىنعا تابان تىرەدى.
ايبەك نۇعىماروۆ اتاپ وتكەندەي، جەكپە-جەك قىزۋ بولدى.
- شىعىس قازاقستانعا الەمنىڭ 30 مەملەكەتى كەلۋى ۇلكەن كورسەتكىش. قازاق كۇرەسى تانىمال بولىپ كەلەدى. بۇل قۋانتارلىق جايت،-دەدى چەمپيون. ماراپاتتان سوڭ جەڭىمپازدار "Qazaq promotion" كومپانياسى ۇسىنعان سالتاناتتى ءارى ۇلكەن كونتسەرتتىك مەرەكەنى تاماشالادى.
ەرتەڭ حالىقارالىق 140 شاقىرىمدىق ات بايگەسى وتەدى.
"ادىرنا" ۇلتتىق پورتالى
