پاۆلوداردا ستوماتولوگيالىق ەم كەزىندە جاعدايى كۇرت ناشارلاعان ءۇش جاستاعى قىز بالا جانساقتاۋ بولىمىنە جاتقىزىلدى، دەپ حابارلايدى “ادىرنا” ءتىلشىسى.
قازىر بالا وكپەنى جاساندى جەلدەتۋ اپپاراتىنا قوسىلعان. بۇل اقپاراتتى پاۆلودار وبلىسىنىڭ دەنساۋلىق ساقتاۋ باسقارماسى راستادى.
الەۋمەتتىك جەلىدە تاراعان اقپاراتقا سايكەس، وقيعا 21 قازاندا قالالىق ستوماتولوگيالىق كلينيكالاردىڭ بىرىندە بولعان. بالانىڭ تۋىسىنىڭ ايتۋىنشا، ءتىس ەمدەۋ كەزىندە قىزدىڭ كوزى الارىپ، تىنىس الۋى بۇزىلعان.
وقيعادان كەيىن كورشى كابينەتتەگى مەدبيكە جەدەل جاردەم شاقىرعان. تۋىسىنىڭ سوزىنشە، جەدەل جاردەم كولىگىندە بالانىڭ جۇرەگى توقتاپ، كەيىن وبلىستىق بالالار اۋرۋحاناسىندا تاعى دا جۇرەك توقتاۋى تىركەلگەن.
پاۆلودار وبلىسىنىڭ دەنساۋلىق ساقتاۋ باسقارماسىنىڭ مالىمەتىنشە، 2023 جىلى تۋعان قىز بالا 21 قازاندا ساعات 15:45-تە وبلىستىق بالالار اۋرۋحاناسىنا جەتكىزىلگەن. ول قابىلداۋ ءبولىمىن اينالىپ ءوتىپ، بىردەن جانساقتاۋ بولىمىنە جاتقىزىلعان.
«قازىر قىز بالا وكپەنى جاساندى جەلدەتۋ اپپاراتىنا قوسىلعان، قارقىندى ەم جۇرگىزىلىپ جاتىر»، – دەپ حابارلادى باسقارما.
سونداي-اق 22 قازاندا انا مەن بالا ۇلتتىق عىلىمي ورتالىعىنىڭ (UMC) جانە ۇلتتىق عىلىمي كارديوحيرۋرگيالىق ورتالىقتىڭ ماماندارىمەن تەلەمەديتسينالىق كەڭەس وتكىزىلگەن. ماماندار ناۋقاستى ەمدەۋ تاكتيكاسى مەن الداعى ەمدەۋ شارالارىن كەلىسكەن.
باسقارمانىڭ حابارلاۋىنشا، بالانىڭ جاعدايى كۇن سايىن دارىگەرلەردىڭ قاتىسۋىمەن وتەتىن كونسيليۋمداردا باعالانىپ وتىر. جاعداي دەنساۋلىق ساقتاۋ باسقارماسى باسشىسىنىڭ جەكە باقىلاۋىندا.
وقيعانىڭ ءمان-جايىن قۇقىق قورعاۋ ورگاندارى تەكسەرىپ جاتىر. تەكسەرۋ ناتيجەسى بويىنشا قۇقىقتىق باعا بەرىلەدى.
