قانشا جامانداساق تا بيلىكتەگى ءوز قازاعىمىز جەر ساتقاندا ۆ.كوسارەۆ جەردىڭ ساتىلۋىنا قارسى بولدى. ال وپاسىز قوسانوۆ جەر تۇگىلى وزىنە رياسىز سەنگەن ءوز حالقىن ساتىپ كەتتى! دوس كوشىم تابالدىرىقتان سەكىردى. ونى قىزى اراشالاي باستادى. قىزىنا قوي دەمەي مە، قىزىنىڭ ارتىنا تىعىلعانى نەسى؟ ءوزى شىعىپ جاۋاپ بەرسىن حالىققا؟ ءبىز دوس كوشىم ءۇشىن عانا قوسانوۆقا داۋىس بەردىك! ايتپەسە، قورابايدىڭ قارا ەسەگىن تانىسا دا قوسانوۆتى ەشكىم تانىمايتىن ەدى. قوسانوۆتىڭ جەڭىپ تۇرىپ جەڭىلۋى، جانە ەل-حالىقتان ءبىرىنشى بوپ توقاەۆتى قۇتتىقتاۋى "جاساندى دراما" ەكەنى انىق بايقالدى. ماڭىراعان ءبىر وتار قويدىڭ مازاسىن باسۋ ءۇشىن قورانىڭ الدىڭعى ەسىگىنەن شىعارىپ، اينالدىرىپ الىپ كەلىپ قورانىڭ ارتقى ەسىگىنەن قايتا قاماعان ارام قويشىنىڭ ارەكەتىن قوسانوۆ ادەمى سومداپ شىقتى. مۇنداي ساحنا ساڭلاعىنا الداعى ۋاقىتتا شەرلوك حولمستىڭ ءرولىن ۇسىناتىن بولار. ال ريناتتىڭ "پارتيا قۇرام" دەگەنى سول قويلاردى سىرعالاپ مەن باعا تۇرامىن. ول ءۇشىن ۇكىمەت دامۋ باعدارلاماسى بويىنشا ماعان سۋبسيديا بولەدى دەگەنى سياقتى بولدى. ريناتجان، سوزىڭە تۇرا المايسىڭ با، ۇيلەرىڭە تاراڭدار دەيتىنىڭ بار، و باستان حالىقتى الاڭعا جيناپ باسىن قاتىرما؟ ءوزى شەر جۇتقان بيشارا حالىقتى كوكپار تارتقانى قۇساتىپ قىردىڭ قىزىل تۇلكىسى وڭعا تارتىپ، ويدىڭ ويشىل تۇلكىسى سولعا تارتىپ دىڭكەلەتىپ جىبەردى. حالىقپەن ولاي ويناۋعا بولمايدى، ويىنى وسىلعىرلار! ميتينگ، بايكوت دەگەندى قويىڭدار! نەگە، سەبەبى، بىرىنشىدەن توقاەۆقا الدەرىڭ كەلمەيدى، قازاقستاننىڭ تۇتقاسى سونىڭ قولىندا! ەكىنشىدەن، توقاەۆتى قۇلاتقاندا ورنىنا كىمدى قويماقشىسىڭدار؟ "سولدات ۆ زاپاسە" دەگەنى سياقتى رەزەرۆتە كىمىڭ بار، ەي؟! ساتقىن قوسانوۆتىڭ جاساعانى انە، كوشىم كورپە استىنان شىعا الماي قالدى، رينات ىشكە ءبىر كىرىپ شىققاننان گامىرى جىبەردى. سوندا كىمنىڭ ءامىرىن ورىنداپ ءجۇرمىز؟ نە نارسەگە شىققاندا دا العا قويعان ءبىر ماقسات-مۇددە بولۋى كەرەك قوي! راسۋل جۇمالى مەشىتكە جۇماعا كەتپەگەن بولار، ال ايدوس سارىمنىڭ سارىنى بەلگىلى بولدى. مىنا جاقتان حالىق قان ىشەدى دە ال ءابىلازوۆ سياقتىلار الەۋمەتتىك جەلىدەن ومونداردىڭ بۇتىنان كوتەرىپ اسپانداتىپ اۆتوبۋسقا ءبىر-بىرلەپ ادام تاسىعان كومەدياسىن تاماشالاپ ۆيسكي ءىشىپ وتىرادى. ۇيلەسە مە؟ ءابىلازوۆ مىقتى بولسا ەلگە كەلىپ، باسى-قاسىندا ءجۇرىپ الىپ شىقسىن حالىقتى الاڭعا! ولاي ىستەي المايدى ەكەن، بوشكى تۇبىنە جاسىرىنىپ ۇرگەن قاندەن يتتەر قۇساپ داريانىڭ ارعى جاعىنان ابالاماسىن! مەن بۇلاردى بيلىكتىڭ ءوزى اتكورىمدا كوك شوپپەن ارنايى دايىنداعان "جاساندى ۇلتشىلدار" دەگەن تۇجىرىمعا كەلدىم. بيلىكتىڭ استاۋىنان حالىقتىڭ جەمىن تارتىپ جەگەن جالعان ۇلتشىلدار جويىلماي كورەتىن كۇنىمىز ءالى الدا!
تۇرار شاپقارا
"ادىرنا" ۇلتتىق پورتالى
