Qanşa jamandasaq ta bilıktegı öz qazaǧymyz jer satqanda V.Kosarev jerdıŋ satyluyna qarsy boldy. Al opasyz Qosanov jer tügılı özıne riiasyz sengen öz halqyn satyp kettı! Dos Köşım tabaldyryqtan sekırdı. Ony qyzy araşalai bastady. Qyzyna qoi demei me, qyzynyŋ artyna tyǧylǧany nesı? Özı şyǧyp jauap bersın halyqqa? Bız Dos Köşım üşın ǧana Qosanovqa dauys berdık! Äitpese, Qorabaidyŋ qara esegın tanysa da Qosanovty eşkım tanymaityn edı. Qosanovtyŋ jeŋıp tūryp jeŋıluı, jäne el-halyqtan bırınşı bop Toqaevty qūttyqtauy "jasandy drama" ekenı anyq baiqaldy. Maŋyraǧan bır otar qoidyŋ mazasyn basu üşın qoranyŋ aldyŋǧy esıgınen şyǧaryp, ainaldyryp alyp kelıp qoranyŋ artqy esıgınen qaita qamaǧan aram qoişynyŋ äreketın Qosanov ädemı somdap şyqty. Mūndai sahna saŋlaǧyna aldaǧy uaqytta Şerlok Holmstyŋ rölın ūsynatyn bolar. Al Rinattyŋ "partiia qūram" degenı sol qoilardy syrǧalap men baǧa tūramyn. Ol üşın ükımet damu baǧdarlamasy boiynşa maǧan subsidiia böledı degenı siiaqty boldy. Rinatjan, sözıŋe tūra almaisyŋ ba, üilerıŋe taraŋdar deitınıŋ bar, o bastan halyqty alaŋǧa jinap basyn qatyrma? Özı şer jūtqan bişara halyqty kökpar tartqany qūsatyp qyrdyŋ qyzyl tülkısı oŋǧa tartyp, oidyŋ oişyl tülkısı solǧa tartyp dıŋkeletıp jıberdı. Halyqpen olai oinauǧa bolmaidy, oiyny osylǧyrlar! Miting, baikot degendı qoiyŋdar! Nege, sebebı, bırınşıden Toqaevqa älderıŋ kelmeidı, Qazaqstannyŋ tūtqasy sonyŋ qolynda! Ekınşıden, Toqaevty qūlatqanda ornyna kımdı qoimaqşysyŋdar? "Soldat v zapase" degenı siiaqty rezervte kımıŋ bar, ei?! Satqyn Qosanovtyŋ jasaǧany äne, Köşım körpe astynan şyǧa almai qaldy, Rinat ışke bır kırıp şyqqannan gämırı jıberdı. Sonda kımnıŋ ämırın oryndap jürmız? Ne närsege şyqqanda da alǧa qoiǧan bır maqsat-müdde boluy kerek qoi! Rasul Jūmaly meşıtke jūmaǧa ketpegen bolar, al Aidos Sarymnyŋ saryny belgılı boldy. Myna jaqtan halyq qan ışedı de al Äbıläzov siiaqtylar äleumettık jelıden omondardyŋ būtynan köterıp aspandatyp avtobusqa bır-bırlep adam tasyǧan komediiasyn tamaşalap viski ışıp otyrady. Üilese me? Äbıläzov myqty bolsa elge kelıp, basy-qasynda jürıp alyp şyqsyn halyqty alaŋǧa! Olai ıstei almaidy eken, böşkı tübıne jasyrynyp ürgen qanden itter qūsap dariianyŋ arǧy jaǧynan abalamasyn! Men būlardy bilıktıŋ özı atkorymda kök şöppen arnaiy daiyndaǧan "jasandy ūltşyldar" degen tūjyrymǧa keldım. Bilıktıŋ astauynan halyqtyŋ jemın tartyp jegen jalǧan ūltşyldar joiylmai köretın künımız älı alda!
Tūrar Şapqara
"Adyrna" ūlttyq portaly
