Adyrna ulttyq portalynda «Qarashada ómir tur». Aqyndar Aqtóbege aıtysýǵa emes, as ishýge jınala ma?» degen taqyryppen materıal jarııalanǵan edi. Sol maqalaǵa qatysty Aqtóbe oblysynyń mádenıet, arhıvter jáne qujattama basqarmasy syrǵyma jaýap berdi, - dep habarlaıdy Adyrna ulttyq portaly.
Adyrna portaly jarııalaǵan maqalada 14 aıtyskerdiń úsh kúndik qonaq úıi men tamaǵy úshin oblys bıýdjetinen 2 mln 122 myń teńge bólingeni, 14 adamdy úsh kún kútý úshin munsha kóp aqsha jumsaý logıkaǵa syımaıtyny synalǵan edi.
Sondaı-aq, basqarmaǵa portal atynan naqty saýal joldanǵan bolatyn.
Tenderdiń tehnıkalyq sıpattamasyna qarasańyz, Aqtóbege qazylar alqasy men aıtyskerler aıtys ótkizýge emes, tamaq ishýge jınalatyndaı áser qaldyrady eken. Soǵan oraı portal tilshisi Mádenıet basqarmasyna: «Saltanatty sharada 30 adam árqaısysy 20 myńnyń tamaǵyn iship alǵan soń, qazylar úsh kúnge dep bólingen – 15 myń, aıtyskerler 10 myń teńgeniń tamaǵyna jáne júgire me? Joq, álde saltanatty sharanyń as máziri qazylar alqasy men aıtysker aqyndarǵa arnalmaǵan ba?» degen saýal joldaǵan edi.
Buǵan oblystyq Mádenıet basqarmasynyń basshysy A. Iýnısova bylaı dep jaýap qatqan:
«2023 jylǵy 18 qarasha kúni Aqtóbede qazaqtyń uly hany Ábilqaıyr hannyń 330 jyldyǵyna arnalǵan «Ultyn súıgen uly tulǵa» atty respýblıkalyq aqyndar aıtysy ótti.
Aıtysty ótkizý jáne uıymdastyrý úshin «Bıýdjet qarajaty esebinen qarjylandyrylatyn Qazaqstan Respýblıkasyndaǵy jáne sheteldegi mádenıet salasyndaǵy áleýmettik mańyzy bar is-sharalar men mádenı is-sharalardy ótkizýdi qarjylandyrý qaǵıdalary men qarjylandyrý normatıvterin bekitý týraly» Qazaqstan Respýblıkasy Mádenıet jáne sport mınıstriniń m.a. 2023 jylǵy 16 aqpandaǵy № 51 buıryǵyna sáıkes Respýblıkalyq baıqaýlar men festıvalderge qatysýshylardyń jol, turý (kelý ýaqyty: 17 qarasha, ketý ýaqyty: 19 qarasha)jáne tamaqtaný boıynsha 2112,0 myń teńge (red: 2 mln 122 myń) shyǵystary bekitildi.
Aıtysty ótkizý jáne uıymdastyrý úshin Qazaqstan Respýblıkasy memlekettik satyp alý portalyna osy 2112,0 myń teńgege usynys baǵa berildi. Memlekettik satyp alýdyń qorytyndy hattamasyna sáıkes jeke kásipker «E A» 1 715,0 myń teńgege (red: 1 mln 715 teńge) utyp aldy. «E A» JK-men kelisim-shart arqyly jumystar júrgizildi.
Berilgen jaýappen kelispegen jaǵdaıda «Qazaqstan Respýblıkasynyń Ákimshilik rásimdik-proestik kodeksi» 91 babyna sáıkes shaǵym bere alasyz» delingen.
Uzyn-sonar syrǵyma jaýaptan túkti uqpadyq. «Saltanatty sharanyń as máziri qazylar alqasy men aıtysker aqyndarǵa arnalmaǵan ba?» degen tike saýalǵa basqarma jaýap tappasa kerek. Sonda Ábilqaıyr hannyń 330 jyldyǵyna aqyndar aıtysýǵa emes, as ishýge kelgeni me? Árıne, respýblıkanyń ár túkpirinen kelgen aqyndar tamaq ta ishedi, qonaq úıge de qonady. Biraq, oǵan bıýdjettiń qarjysy jumsalatyn bolǵandyqtan tender esebi kúmán týdyrmaıtyndaı bolǵany kerek qoı.
Bizdiń aıtpaǵymyz osy ǵana...
Qanat Birlikuly
Adyrna ulttyq portaly
