كوشەگە كوجە ىشەيىن، نەمەسە، كۇبىدە قىمىزدى پىسەيىن دەپ شىققان جوقپىن، ۆاتساپ ارقىلى «ماحابابت ميتينگىسى بولادى ەكەن!» دەگەن حابارلاندىرۋدى قۇلاعىما ءىلىپ الدىم دا، جەلىگىپ، جەتىپ كەلەيىن!
ماحاببات دەرتىنە ۇشىراعاندار قولدارىنا بىر–بىردەن جۇرەك سۋرەتىن، ۇرىلگەن جۇرەك پىشىندەس شارلارىن كوتەرىپ كەلەدى ەكەن! الدىڭعى قاتاردا كارى قىزدار، ەكىنشى قاتاردا ماحابباتتا جولى بولماعاندار، ءۇشىنشى قاتاردا ماحابباتقا كەدەرگى كەلتىرىپ جۇرگەن وڭباعاندار، ءتورتىنشى قاتاردا ماحابباتتان كوڭىلى قالعان كەمپىرلەر، شاتىن شاپالاقتاعان شالدار...
–ماحابابت دەموكراتيسى جاساسىن!
–ەلىمىزدە قىز الىپ قاشاتىندار جويىلسىن!
–شەتەلدىكتەرگە تيگەن قىزدار سالىق تولەسىن!
–ماحاببات دەرتىمەن اۋىرىپ، ماحاببات مۇگەدەگى بولعاندارعا جەڭىلدىكتەر بەرىلسىن!
وسىنداي ۇراندارمەن ۇرالاعان ماحاببات شەرۋى ماحاببات پوليتسياسىنىڭ توسقاۋىلىمەن اياقتالدى. جۇرەگىم اۋىرىپ، ءوزىم جاقسى كورەتىن قىزدى ىزدەپ كەلەمىن. انە، ول دا ماحاببات شەرۋىنە قوسىلدى. وعان ۇمتىلامىن، ەكى پوليتسەي جىبەرمەيدى. قاشىپ كەتىپ ەدىم، قۋالاپ ءجۇرىپ ۇستاپ الدى دا:
–«ماحاببات» پارتياسىنانسىڭ با؟ –دەپ سۇرادى.
–جوق.
–ولاي بولسا، ماحاببات پوليتسيا بولىمشەسىنە ءجۇرىڭىز!
–نە ءۇشىن؟
–ماحابباتى جوق ادامدار جازالانادى. ماحاببات كودەكسىنىڭ 101 بابى بويىنشا.
–جىبەرىڭىزدەر، مەن ۇيگە بارا جاتىر ەدىم. مەنىڭ جۇرەگىمدە ماحاببات جوق! –دەدىم مەن ادەيى. پوليتسەيلەر بۇل ۋاجىمە قارامادى. ءوزىم ۇناتقان سۇيىكتىمنىڭ كوزىنشە تۇتقىنداپ، ماحاببات بولىمشەسىنە الىپ كەتتى. قۇدايىم–اۋ، مۇندا كىمدەر بار دەيسىزدەر مە، كەڭكىلدەپ كۇلگەن كەمپىرلەردە، شيقىلداپ وتىرعان شالدار دا، كۇرسىنىپ، كۇڭىرەنىپ وتىرعان كارى قىزدار دا وسىندا. «ماحاببات سەنىڭ نە تەڭىڭ؟» دەپ تەرگەيدى ءبىر كەمپىردى تەرگەۋشى. كەمپىر كەڭكىلدەپ كۇلىپ: «العاشقى ماحابباتىمدى ۇمىتا الماي ءجۇرمىن، قاراعىم!» دەيدى. قىسقاسى، ماحاببات شەرۋىنە قاتىسقانىم ءۇشىن جازا ارقالادىم: ءوزىم سۇيمەگەن بوتەن قىزبەن ءبىر كامەراعا قاماپ، ون سەگىز رەت زورلاپ سۇيگىزدى. قىرىق قىزدى بىرتىندەپ قۇشاقتاتتى. مۇنداي قورلىققا شىداي الماي، شاشىم اعارىپ، مۇرتىم گۇلدەپ كەتتى. و، ماحاببات، سەن ماڭگى جاسايسىڭ، ادامدار اراسىندا! ماحابباتتى تۇتقىنداۋعا بولمايدى!
مۇحتار شەرىم
"ادىرنا" ۇلتتىق پورتالى
