مەديتسينا قىزمەتكەرلەرى كۇنى قارساڭىندا وسكەمەن قالاسىندا وبلىستىڭ دەنساۋلىق ساقتاۋ سالاسىنىڭ ماماندارىنا ارنالعان سالتاناتتى شارا ءوتتى. شارا بارىسىندا سالانىڭ بىرقاتار ماماندارىنا شقو اكىمىنىڭ ارنايى ماراپاتتاۋ قاعازى، پاتەر كىلتتەرى، اقشالاي جانە تۇرعىن ءۇي سەرتيفيكاتتارى تابىستالىپ، ىستىق ىقىلاسقا بولەندى.
«مەديتسينا سالاسى – ەڭ باستى، ءارى ماڭىزدى سالا. قۇرمەتتى دەنساۋلىق ساقتاۋ سالاسىنىڭ ماماندارى، سىزدەر ادامداردىڭ ءومىرى ءۇشىن كۇرەسىپ، ولارعا ءۇمىت سىيلاپ جۇرەسىزدەر. وزگە جانداردىڭ ءومىرىن قۇتقارۋ ءۇشىن كوپ نارسەنى قۇربان ەتەسىزدەر. سوعان قاراماستان مەيىرىمدى بولىپ قالا الاسىزدار. وسى ءۇشىن سىزدەرگە العىسىمىز شەكسىز. ءبىزدىڭ مەديتسينا سالاسى دامي ءتۇسۋى ءۇشىن قولىمىزدان كەلگەنىن جاسايمىز»، - دەدى سالتاناتتى جيىندا وبلىس اكىمى دانيال احمەتوۆ.
ايماق باسشىسى شىعىستاعى بىرقاتار ەڭبەكقور، ءوز ءىسىنىڭ شەبەرى اتانعان، جاۋاپكەرشىلىگى مول بىلىكتى دارىگەرلەردىڭ كوپ ەكەنىن ايتتى.
بۇل كۇنى بىرقاتار ۇزدىك ماماندار اتاۋلى ماراپاتتارعا يە بولدى. سونىمەن قاتار، وزدەرىنىڭ كاسىبي مەرەكەلەرىنىڭ قارساڭىندا ون شاقتى دارىگەرگە پاتەر كىلتى تابىس ەتىلدى. ال سانيتار، فەلدشەر مەدبيكەلەر مەن تاجىريبەدەن ءوتىپ جۇرگەن دارىگەرلەرگە، اۋداندىق جانە قالالىق اۋرۋحانالاردىڭ باس دارىگەرلەرىنە، جەدەل جاردەم قىزمەتىنىڭ جۇرگىزۋشىلەرىنە اقشالاي سىياقى مەن ماراپاتتاۋ قاعازدارى تابىستالدى. اعىمداعى جىلى العاش رەت دەنساۋلىق ساقتاۋ سالاسىنىڭ ماماندارىنا تەك اقشالاي سىيلىقتار عانا ەمەس، «سەنىم» كاسىپوداعى اتىنان تۇرعىن ءۇي سەرتيفيكاتتارى دا تابىس ەتىلدى.
سالتاناتتى شارا بارىسىندا «وبلىستىڭ دەنساۋلىق ساقتاۋ سالاسىنا قوسقان ەرەن ەڭبەگى ءۇشىن» بسمپ حيرۋرگيا ءبولىمىنىڭ دارىگەرى دۇيسەن تاجىباەۆ ماراپاتتالدى. دياگنوستيكا مەن ەمدەۋدىڭ جاڭا تەحنولوگياسىن ەنگىزگەنى ءۇشىن شقو وسمتس رەنتگەن-ەندوۆاسكۋليارلى زەرتحاناسىنىڭ باسشىسى مۇحتار قوراباەۆ ماراپاتتالسا، سەمەيدىڭ №31 بريگاداسى ۇزدىك جەدەل جاردەم بريگاداسى اتاندى. «ەڭ ۇزدىك وتا جاساۋ» نوميناتسياسىمەن وبلىستىق اۋرۋحانانىڭ بريگاداسى ماراپاتتالدى. ال «ءوز ماماندىڭىنا دەگەن ادالدىعى ءۇشىن» نوميناتسياسىنا كەزەكشى مەدبيكەلەر – گۇلداريا نۇراحمەتوۆا مەن نۇرعايني ساپارعاليەۆا يە بولدى. ەڭ ۇزدىك ناۋقاستاردى قالپىنا كەلتىرۋ ورتالىعى بولىپ شقو-داعى رەابيليتاتسيالىق ورتالىق اتاندى. «تاڭعاجايىپ ءىس-ارەكەت جاساعانى ءۇشىن» ميكروحيرۋرگيا ءبولىمىنىڭ باسشىسى اەليتا بايبوسىنوۆا ماراپاتتالدى. ول ادينا جانە امينا ەسىمدى ەگىزدىڭ كورۋ قابىلەتىن ساقتاپ قالعان. اۋىلدىق مەديتسينا سالاسىنىڭ ۇزدىگى بولىپ اياگوز اۋدانىنىڭ اۋرۋحاناسى اتاندى. «ەڭ ۇزدىك مەنەدجەر» نوميناتسياسىمەن وبلىستىق اۋرۋحانانىڭ باس دارىگەرى جايىق جۇماحان مەن №17 دارىگەرلىك امبۋلاتورياسىنىڭ باس دارىگەرى ۆلاديمير لي ماراپاتتالدى. تسيفرلاندىرۋ بويىنشا وسكەمەندەگى №4 قالالىق اۋرۋحانا كوشباسشى اتاندى.
ايتا كەتەيىك، سوڭعى جىلدارى شقو-نىڭ دەنساۋلىق ساقتاۋ سالاسىندا وڭ وزگەرىستەر مەن دامۋ بايقالادى. مەديتسينا سالاسىنا جەرگىلىكتى بيلىكتىڭ ەرەكشە كوڭىل ءبولۋىنىڭ ارقاسىندا، اتالمىش سالاعا ەلەۋلى قارجى جۇمسالىپ، زاماناۋي تەحنيكالارمەن جابدىقتالۋدا جانە الدەمدىك ستاندارتتارعا ساي بولۋ ءۇشىن ءتۇرلى جاعدايلار جاسالۋدا. ناۋقاستاردى ەمدەۋدىڭ جاڭاشا ادىستەرى ەنگىزىلىپ، دارىگەرلەردى شەتەلگە تاجىريبە الماسۋ ماقساتىندا جىبەرۋ ارقىلى شقو مەديتسيناسىندا ەلەۋلى وزگەرىستەر ورىن الۋدا.
"ادىرنا" ۇلتتىق پورتالى
