استانادا «استانا وپەرا» تەاترىنىڭ ساحناسىندا ونەر سالاسىنىڭ ۇزدىكتەرى انىقتالىپ، شىعارماشىلىق ۇجىمدار مەن سالا قايراتكەرلەرىنە «Umai-2023» ۇلتتىق سىيلىعى تابىستالدى.
«Umai-2023» ۇلتتىق سىيلىعىنىڭ سالتاناتتى ءراسىمىن مادەنيەت جانە اقپارات ءمينيسترى ايدا بالاەۆا اشىپ، بايقاۋدىڭ بارلىق قاتىسۋشىسىن قۇتتىقتاپ، ونەر سالاسىنىڭ وكىلدەرىنە ۇلكەن شىعارماشىلىق جولدا جاڭا جەتىستىكتەر تىلەپ جانە «تەاتر ونەرى» نوميناتسياسى بويىنشا: «ۇزدىك سپەكتاكل» (مۋزىكالىق درامالىق) «گاۋھارتاس» د.يسابەكوۆتىڭ (قويۋشى رەجيسسەرى – اسحات ماەميروۆ) مۋزىكالىق جاس كورەرمەن تەاترى ۇجىمىن ماراپاتتادى.
سونىمەن قاتار، مينيستر ايدا عالىمقىزى ۇجىمعا اقشالاي سىيلىق (7 000 000 تەڭگە) سەرتيفيكاتىن تابىستادى.
«دارىندى شىعارماشىل ۇجىم مەن تۇلعالاردى قولداپ جانە ىنتالاندىرىپ جاتقان قر مادەنيەت جانە اقپارات مينيسترلىگىنە العىس بىلدىرەمىز. سونداي-اق «Umai-2023» سىيلىعى جاڭا جاسامپاز بۋىندى ىنتالاندىرىپ، ەلىمىزدەگى ونەردىڭ ءاربىر باعىتىن دامۋىن جەدەلدەتۋشى، ۇلتتىق مادەني كاپيتالىن نىعايتاتىنىنا سەنىمىمىز مول»، - دەدى استانا قالاسى مۋزىكالىق جاس كورەرمەندەر تەاترىنىڭ ديرەكتورى، رەجيسسەر اسحات ماەميروۆ.
«Umai-2023» ۇلتتىق سىيلىعىن جەڭىپ العان “گاۋھارتاس” مۋزىكالىق دراماسى پرەمەراسى وتكەن كۇننەن باستاپ، 8 ايدىڭ ىشىندە كورەرمەن نازارىنا "گاۋھارتاس" سپەكتاكلى 155 مارتە ۇسىنىلدى.
قويىلىمدى 65 مىڭعا جۋىق كورەرمەن تاماشالادى.
“وسىنداي ومىرشەڭ تۋىندى جازعان جازۋشى-دراماتۋرگ دۋلات يسابەكوۆ اعامىزعا مىڭ العىس”، -دەدى اسحات ماەميروۆ
ايتا كەتەيىك، جالپى جۇلدە قورى 79 ميلليون تەڭگەنى قۇرايتىن Umai ۇلتتىق سىيلىعىن قر مادەنيەت جانە اقپارات مينيسترلىگى وتكەن جىلدان بەرى ونەر ساڭلاقتارىنا تابىستاپ كەلەدى.
