بۇقارالىق اقپارات قۇرالدارى قىزمەتكەرلەرى كۇنى قارساڭىندا اقوردادا جۋرناليستەر مەن مەديا سالاسىنىڭ وكىلدەرىنە ارنالعان سالتاناتتى جيىن ءوتتى، دەپ حابارلايدى "ادىرنا" ۇلتتىق پورتالى.
ءىس-شارا بارىسىندا پرەزيدەنت قاسىم-جومارت توقاەۆ سالا ماماندارىن كاسىبي مەرەكەمەن قۇتتىقتاپ، وتاندىق جۋرناليستيكانىڭ دامۋىنا ەلەۋلى ۇلەس قوسقان ارداگەرلەر مەن تاجىريبەلى مامانداردىڭ ەڭبەگىن جوعارى باعالادى.
مەملەكەت باسشىسى قازاق تىلىندە تۇڭعىش ەفير جۇرگىزگەن، بۇگىندە 106 جاسقا تولعان تەلەۆيزيا ارداگەرى زۇلقيا جۇماتوۆانى «قۇرمەت» وردەنىمەن ماراپاتتادى.
سونداي-اق پرەزيدەنت قازىرگى مەديانىڭ دامۋىنا ۇلەس قوسىپ جۇرگەن بىرقاتار بەلگىلى جۋرناليستەردى اتاپ ءوتىپ، ولاردىڭ تاجىريبەسى جاس بۋىنعا ۇلگى ەكەنىن جەتكىزدى.
جيىندا جۋرناليستەردى الەۋمەتتىك قولداۋ شارالارىنا دا ەرەكشە نازار اۋدارىلدى. بيىل العاش رەت وڭىرلەردە ەڭبەك ەتىپ جۇرگەن باق وكىلدەرىنە پاتەر كىلتتەرى تابىستالاتىنى ءمالىم بولدى. جالپى العاندا، وسى جىلى 66 مەديا قىزمەتكەرى باسپانامەن قامتىلادى.
